«Ливерпул» Лига Кубогининг чорак финалига чиқолмай, «Кристал Пэлас»га 0:3 ҳисобида мағлуб бўлди. Мерсисайд жамоаси учун бу охирги ҳафталардаги навбатдаги нохуш натижа бўлди. Учрашувдан сўнг бош мураббий Арне Слот оммавий ахборот воситалари билан суҳбатда жамоа ҳолати ва мағлубият сабабларига ойдинлик киритди.
Слотнинг айтишича, жамоада сўнгги ҳафталарда физик ва психологик чарчоқ жуда юқори. «Аслида, турли баҳоналарни топиш мумкин, лекин бу натижаларни оқлайдиган жиддий сабаб йўқ. Сўнгги олти ўйиннинг бештасида ютқаздик — бу “Ливерпул” учун қабул қилиб бўлмас кўрсаткич», — деди мураббий.
Унинг сўзларига кўра, жамоа сўнгги пайтларда жуда қисқа муддат ичида кўплаб учрашувлар ўтказган. «Охирги ҳафталарда ҳар уч кунда бир ўйин ўтказишга тўғри келди. Айниқса, Европадаги оғир баҳслардан кейин футболчиларнинг тикланиши қийин бўлди», — деди Слот.
Мураббий, шунингдек, жамоа таркибида жароҳатлар сони кўпайганини ҳам таъкидлади. «Бугунги баҳсда қайси футболчиларни майдонга туширганимни кўрдингиз. Мен ўтган ҳафтада кўп ўйнаган асосий таркиб аъзоларига дам беришни маъқул кўрдим. Бу қарор тўғри бўлди, чунки кейинги ҳафта биз учун жуда муҳим бўлади», — деди у.
Слот таъкидлашича, «Ливерпул» доим Лига Кубогида академия тарбияланувчиларига имконият беришни одат қилган. «Бу мусобақа доимо ёшлар учун синов майдони бўлиб келган. Биз ҳам бу анъанадан чекинмадик. Лекин ёш футболчиларга тажриба керак, бу эса вақт талаб қилади», — дея қўшимча қилди мураббий.
Унинг фикрича, «Ливерпул»нинг ҳозирги таркиби ҳали етарлича барқарор эмас: «Ҳозирги жамоамиз одамлар тасаввур қилгандек қудратли эмас. Биз бу ҳақда реал фикрда бўлишимиз керак. Мақсадимиз — жамоавий ўйинни яна тиклаш ва асосий футболчиларни соғлом ҳолда сақлаш».
Слотнинг бу баёноти мухлислар орасида турлича фикрларга сабаб бўлди. Кўпчилик унинг очиқ ва холис чиқишини юқори баҳолади, айримлар эса жамоанинг сўнгги натижалари учун баҳоналар етарли эмаслигини таъкидлашди.
Эндиликда «Ливерпул» ўз диққатини Англия Премьер-лигаси ва Европа мусобақаларидаги баҳсларга қаратади. Арне Слотнинг айтишича, жамоа кейинги ҳафтадаги ўйинларга тўлиқ куч билан тайёргарлик кўрмоқда ва мағлубиятлар силсиласини тўхтатишни мақсад қилган.
