Мадриднинг "Реал" клуби ҳужумчиси Килиан Мбаппе ўтган Европа мавсумининг энг яхши тўпурари сифатида "Олтин бутса" совринини қўлга киритди. Мукофотни қабул қилиб олгач, франциялик футболчи ўз фикрлари билан ўртоқлашди.
"Ҳаммага салом! Мен испан тилида гаплашаман, чунки ҳеч ким францус тилини тушунмайди (кулади).
Ташриф буюрганингиз учун раҳмат. Мен учун "Олтин бутса" совринини қўлга киритиш катта шараф.
Бу мен учун жуда муҳим. Жамоадошларимга ҳар доим ёнимда бўлиб, ёрдам берганликлари учун миннатдорчилик билдирамоқчиман.
Бизнинг жамоамиз ажойиб ва кўплаб ютуқларга эришишимиз мумкин. Мадриднинг "Реал" клубини ҳимоя қилиш мен учун катта бахт.
Бу орзуйим болалигимдан бошланган. Энди бу ерда бўлганимдан хурсандман ва умид қиламанки, узоқ вақт давомида шу ерда қоламан.
"Реал" мухлисларига ҳам раҳмат, уларнинг қўллаб-қувватлови жуда муҳим. Умид қиламанки, кейинги сафар яна "Олтин бутса"ни қўлга киритаман.
Мавсумни яхши бошладим, аммо кўрамиз. Ҳамманинг ёрдами учун раҳмат.
Бизда кучли таркиб бор. Бу мавсумда кўплаб совринларни қўлга киритамиз деган умиддаман.
Энг муҳими – жамоавий совринлар!" – деди Мбаппе. Мадриднинг "Реал" клуби 1-ноябр, шанба куни Ла Лига доирасида "Валенсия"га қарши ўз майдонида ўйин ўтказишга тайёргарлик кўрмоқда.
