Рим клуби афсонаси Даниеле Де Росси "Генуа" жамоасининг янги бош мураббийи бўлиш учун асосий номзодлардан бири сифатида кўрилмоқда. Жорий йил 1-ноябр куни француз мутахассиси Патрик Виьера истеъфога чиқарилган эди.
Олдинда "Сассуоло"га қарши ўйинда жамоани вақтинча мураббийлар — Роберто Мургита ва Доменико Кришито бошқаради. А Сериянинг 9-туридан сўнг атиги 3 очко билан турнир жадвалидаги сўнгги поғонада бўлган "Генуа" кейинчалик доимий бош мураббийни излашни бошлайди.
Кришито ва Мургита доимий мураббий сифатида қолдирилиши эҳтимоли ҳам мавжуд. Шу билан бирга, La Gazzetta dello Sport хабарига кўра, бу лавозимга Раффаэле Палладино, Паоло Ваноли, Лука Готти ва Даниеле Де Росси каби бошқа номзодлар ҳам даъвогарлик қилишмоқда.
Де Росси "Рома"ни 2024/25-йилги мавсумда тарк этганидан бери ишсиз қолган.
