Ўзбекистон ампутантлар терма жамоаси Жаҳон чемпионати–2026 саралаш босқичини шиддат билан якунлади. Терма жамоамиз бугунги ҳал қилувчи баҳсда Яманга қарши майдонга тушди ва рақиб дарвозасига жавобсиз 13 та тўп киритиб, ёрқин ғалабага эришди, деб хабар берди Ўзбекистон ампутантлар ассоциацияси матбуот хизмати.
Ўйин бошиданоқ Ўзбекистон футболчилари устунликни қўлга олди. Биринчи бўлимдаёқ бир неча гол урган жамоа ўз ўйинини тўлиқ назорат остида ушлади. Ҳар бир футболчи ўзаро тушуниш ва жамоавий уйин орқали майдондаги устунликни сақлаб қолди. Йирик ҳисобдаги бу ғалаба нафақат мухлисларни хурсанд қилди, балки жамоа учун тарихий натижа сифатида қайд этилди.
Шу натижа билан Ўзбекистон ампутантлар термаси саралаш босқичида 9 очко жамғариб, кейинги йил Коста-Рикада бўлиб ўтадиган Жаҳон чемпионатида қатнашиш ҳуқуқини қўлга киритди. Бу натижа жамоамизнинг халқаро даражадаги нуфузини янада оширди ва ампутантлар футболидаги ривожланиш йўлидаги муҳим қадам бўлди.
Маълумот учун, 2026 йилги Жаҳон чемпионатида 24 терма жамоа иштирок этади. Мусобақа Коста-Риканинг бир нечта шаҳарларида 31 июлдан 6 августга қадар бўлиб ўтади. Унда жаҳоннинг энг кучли ампутант жамоалари ғолиблик учун беллашади.
Ўзбекистон терма жамоаси учун бу йўлланма сўнгги йилларда амалга оширилаётган тизимли иш натижаси ҳисобланади. Ассоциация ва мураббийлар штаби томонидан жисмоний тайёргарлик, тактик машғулотлар ҳамда спортчи саломатлигига эътибор кучайтирилгани ўз самарасини берди.
Мураббийлар жамоаси бу ғалабани жамоавий меҳнат ва бирдамлик натижаси деб баҳолади:
“Бизнинг йигитлар фидойилик билан ҳаракат қилишди. Бу натижа бутун Ўзбекистон ампутантлар спорти учун янги босқични англатади”, — дейди жамоа бош мураббийи.
Ўзбекистон ампутантлар термаси сўнгги йилларда минтақадаги етакчи жамоалардан бирига айланди. Улар нафақат майдондаги маҳоратлари, балки жонкуярлик ва меҳнатсеварлиги билан ҳам эътироф этилмоқда.
Коста-Рикада бўладиган мусобақагача жамоа халқаро йиғинлар ва бир қатор назорат учрашувлари ўтказиши режалаштирилган. Мақсад — терма жамоани жаҳон биринчилигида муносиб иштирок этишга тайёрлаш ва ампутантлар футболида Ўзбекистон байроғини яна бир бор юксакда намоён этиш.
Бу ғалаба мамлакатимизда имконияти чекланган спортчилар учун ҳам катта илҳом манбаи бўлди. Ўзбекистон ампутантлар термаси бир ёқадан бош чиқариб ҳаракат қилганда, ҳар қандай тўсиқни енгиш мумкинлигини амалда исботлади.
“Zamin”ни Telegram'да ўқинг!
