БААда ўтаётган “Ал Айн Кубоги”да миллий терма жамоамиз мусобақани жуда кучли рақиб — Муҳаммад Салоҳ етакчилигидаги Мисрга қарши беллашув билан бошлади ва айни пайтда ёдда қоларли ўйин намойиш этди. Каннаваро шогирдлари биринчи дақиқаларданоқ рақибни қийин аҳволда қолдириб, 2:0 ҳисобидаги муносиб ғалабага эришиб, финалга йўлланма олди.
Бу баҳсдаги энг катта қаҳрамонлардан бири шубҳасиз Остон Ўрунов бўлди. Унинг икки бор аниқ тепган зарбалари нафақат ўйин тақдирини ҳал қилди, балки мухлисларнинг кайфиятини ҳам кўтарди. Айниқса, овозсиз қолдирган биринчи голи кўпчиликнинг эътирофига сазовор бўлди.
Учрашувдан сўнг тажрибали мутахассис — Жаъфар Ирисметов Sports.uz билан суҳбатлашиб, ўйин ҳақидаги фикрларини баён этди.
Ирисметовнинг айтишича, биринчи таймдаги ҳаракат соҳада устунлик ким томонда эканини аниқ кўрсатди. Унинг таъкидлашича, терма жамоамиз бугун исталган рақибга қарши муносиб ўйин кўрсата оладиган даражада шаклланаётгани сезилди. Иккинчи бўлимда ҳужумлар сони камайганини эса у йигитларнинг натижани сақлаб қолиш мақсадида ҳимояга кўпроқ эътибор қаратгани билан изоҳлади.
У умумий ўйиндан мамнунлигини билдириб, танланган тактик ёндошувни маъқуллади: биринчи таймда зарур голларни уриб олиб, кейинги бўлимда натижани ушлаб туриш — мусобақа футболининг энг тўғри йўл-йўриғи, деб таъкидлади.
Остон Ўруновга берган баҳосида эса Ирисметов унда яна катта салоҳият борлигини қайд этди. Жароҳатдан кейин формаси тўлиқ тикланмаганига қарамай, у ажойиб ўйин намойиш этгани, формасини тўла тиклаганда эса жаҳон чемпионатида бундан ҳам кучли ўйин кўрсатиши мумкинлигини билдирди.
Фабио Каннаваронинг терма жамоадаги изи бор-йўқлиги ҳақидаги саволга жавобан мутахассис: “Албатта, Мисрга қарши ўйинда муайян жиҳатлар намоён бўлди. Ҳимоявий тактика ва қарши ҳужумлар орқали рақибни ҳайратга солдик. Миср бундай ўйинни кутмаган, шу боис биз улар учун сюрпризга айландик”, — деди.
Финалда яна Эрон. Бу жуфтликдан зерикмадингизми, деган саволга Ирисметов жиддий муносабат билдириб, бу ўйин жуда қизиқарли кечишини, Эрон қитъамиздаги энг кучли жамоалардан бири эканини, шундай рақибга қарши ўйнаш фақат фойда беришини таъкидлади. У Машаариповнинг тез орада таркибга қайтиши ҳам жамоага куч бағишлашини айтиб ўтди.
Суҳбат охирида журналистлар орасида тарқалган — Ирисметовнинг келаси мавсум “Навбаҳор”да иш бошлаши ҳақидаги тасдиқланмаган маълумотларга ҳам ойдинлик киритди. У бундай гаплар ҳар йили пайдо бўлишини, аммо ҳозирча аниқ таклиф йўқлигини маълум қилди. “Яхши жамоа шакллантиришга кучимиз етади, қайси клуб бўлишидан қатъи назар, ишлашдан тўхтамаймиз”, — деди у.
Финал 18 ноябрь куни ўтказилади. Терма жамоамиз бундай ишончли ўйинлари билан финалда ҳам мухлисларни қувонтира олишига ишонч баланд.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
