17:03 / 17.11.2025

Эрон юлдузи финал олдидан Ўзбекистонга қаттиқ баҳо берди

Al Ain Cup мусобақасининг ҳал қилувчи беллашуви яқинлашар экан, Эрон миллий жамоаси ярим ҳимоячиси Меҳди Ҳошимнажот Ўзбекистонга қарши финал олдидан ўз муносабатини билдириб ўтди. Унга кўра, жамоа умумий ҳолати яхши, футболчилар ўзларини жисмонан ҳам, руҳан ҳам финалга тайёр ҳис этмоқда.

Ҳошимнажотнинг айтишича, финал – ҳамиша бошқа ўйинлардан тубдан фарқ қиладиган, ирода, босимга чидамлилик ва дақиқ ҳаракатларни талаб қилувчи беллашув. Шу боис Эрон терма жамоаси ушбу ўйинни ҳатто оддий мусобақа деб эмас, соврин учун сўнгги қадам сифатида кўряпти.

У футболчи сифатида жамоа номидан бир нарсани ишонч билан айтди: улар финалда бор кучини ишга солишга бел боғлаган. Унга кўра, финалда мухлислар техникаси юқори, ўйини жиддий ва маҳоратли тарзда кечадиган бир жамоани кўришади.

Ҳошимнажот Ўзбекистонга қарши ўйинлар ҳақида ҳам тўхталиб ўтди. Унинг эслашича, охирги бор беллашганда Эрон жамоаси иккинчи дақиқаданоқ бир ўйинчидан айрилган эди ва ўйинни ўн киши бўлиб давом эттиришга мажбур бўлган. Шунга қарамай, Ўзбекистон ўшанда ҳам ўзини кучли, тез ривожланаётган ва интизомли жамоа сифатида намоён этган.

Футболчининг фикрича, терма жамоаси сўнгги учрашувда ҳам ўз кучини кўрсатди ва финал айнан ўша ривожланиш натижасига яна бир имтиҳон бўлади. У шундай деб таъкидлади:

«Финалда ўйин шиддати катта бўлади. Биз ҳам таниқли футболчиларга эга катта жамоамиз. Ҳар биримиз барча салоҳиятимизни ишга солиб, энг яхши натижага эришиш учун бор имкониятимизни сарфлаймиз».

У шунингдек, кўпчилик Мисрни финалга чиқади деб ўйлаганини, аммо тақдир уларни яна Ўзбекистон билан тўқнаштирганини айтиб ўтди. Ҳошимнажотнинг фикрича, финалдаги энг муҳим жиҳат – рақиб эмас, балки ўз услубини йўқотмаслик, жамоавий ўйинни тўғри йўлга қўйиш.

У Ўзбекистонни жаҳон чемпионатига йўлланган жамоа сифатида юқори баҳолади ва финал мухлислар учун эмоцияларга тўла, қизғин ва мураккаб беллашувдан хабар беришига ишонч билдирди.

Эслатиб ўтамиз, Ал Ain Cup финали 18 ноябрь куни соат 21:00 да бошланади. Мухлислар учун яна бир юрак урар, катта босим остида ўтадиган жанг кутилмоқда.