ЎФА матбуот хизмати миллий терма жамоамиз бош мураббийи Фабио Каннаваронинг ноябрь ойида ўтган йиғин ва халқаро мусобақа якунлари юзасидан билдирган фикрларини эълон қилди. Италиялик мутахассиснинг фикрларидан жамоа ичидаги ишонч, ғайрат ва келажакка қаратилган аниқ мақсадлар яққол сезилиб туради.
Каннаваро таъкидлашича, асосий мақсад — 2026 йилги Жаҳон чемпионатига нафақат рақобатбардош, балки ҳар жиҳатдан тайёрланган, ўз кучига ишонган ва дунё футболидаги вазиятдан хабардор таркиб билан чиқиш. Унинг сўзларига кўра, БААда ўтказилган “Al Ain Cup” мусобақасидаги ғалаба жамоа учун катта руҳий туртки бўлди. Ахир, ФИФА рейтингида юқори ўринда турган Миср ва Эрон каби жамоалар устидан қайд этилган ишончли натижалар — келажакка боғлаб бўлмайдиган муҳим ўргатувчи тажрибадир.
Бош мураббий бу ғалабаларни йўлнинг охири эмас, балки катта сафарнинг бошланиши сифатида баҳолади. Унинг фикрича, барқарор ва тизимли тарзда шаклланадиган жамоа учун ҳар бир йиғин, ҳар бир ўйин ва ҳар бир машғулотда максимал ғайрат талаб этилади. Каннаваро жамоа олдида турган вазифаларни “қадамма-қадам амалга ошириладиган узоқ йўл” деб тавсифлади ва барча футболчиларни фидойиликка, интизомга ҳамда ўз устида ишлашни тўхтатмасликка чорлади.
Мураббийнинг айтишича, миллий жамоа — бир тану бир жон бўлган тузилма, ва ундаги ҳар бир аъзо нафақат ўзи, балки бутун мамлакат номи учун ҳаракат қилади. Шундан келиб чиқиб, Каннаваро Ўзбекистон халқини жамоа билан бирга катта мақсадларни орзу қилишга чақирди: “Биз — бир жамоамиз. Ўзбекистон халқи. Келинг орзуларимиз йўлида биргаликда қадам ташлайлик”.
Йиғин якунлари яна бир бор миллий жамоа тўғри йўлда эканини кўрсатди. Олдинда эсa жиддий ва қийин синовлар бор, бироқ бош мураббий ва футболчиларнинг кайфияти — тўла ишонч ва таянчи бор жамоани кўрсатмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
