Фарғонанинг фахри бўлган «Нефтчи» клуби узоқ йиллик танаффусдан сўнг яна мамлакат футболининг энг юқори чўққисига чиқди. 24 йиллик соғинчга барҳам бериб, олтин медалларни қўлга киритган жамоани қутлаш учун стадионга ташриф буюрган вилоят ҳокими Хайрулло Бозоров ҳаяжонли нутқ сўзлади ва келажак режалари билан ўртоқлашди.
Чорак асрлик ғалаба таъми
Вилоят раҳбари ўз нутқида ушбу кун тарих зарварақларига олтин ҳарфлар билан ёзилишини таъкидлади.
«Бугун биз нақ 24 йил, қарийб чорак аср интиқлик билан кутган кун келди. «Нефтчи» ўз тарихида олтинчи бор чемпионликни расмийлаштирди. Барчангизни ушбу тарихий ғалаба билан чин юракдан муборакбод этаман! Бу ютуқлар замирида Президентимизнинг спортга, хусусан футболга қаратаётган юксак эътибори ҳамда футболимизда қарор топган адолат ва ҳалоллик тамойиллари ётибди», — деди Хайрулло Бозоров.
2026 йил — ўзбек футболи йили
Ҳоким яқинлашиб келаётган 2026 йил Ўзбекистон учун унутилмас бўлишини, миллий терма жамоамиз илк бор Мундиалда иштирок этишини фахр билан эслатиб ўтди. Шунингдек, ЎФА ва ПФЛ раҳбариятига футбол ривожидаги ҳиссалари учун миннатдорчилик билдирди.
Водий аҳлига ташаккур
«Нефтчи»нинг чемпионлик йўлидаги машаққатли кунларида жамоани ёлғизлатиб қўймаган мухлислар эътироф этилди. Ҳоким нафақат фарғоналик, балки қўшни Наманган ва Андижон вилоятларидан келиб, «Водийга катта футбол қайтмоқда» деган умид билан жамоани қўллаб-қувватлаган барча ишқибозларга раҳмат айтди.
Асосий мақсад — Футбол пойтахти
Сўзининг якунида Хайрулло Бозоров вилоятдаги бошқа жамоалар — «Қўқон-1912», «ФарДУ» ва қуйи лига вакилларига ҳам эътибор кучайишини маълум қилди.
“Zamin”ни Telegram'да ўқинг!«Мана, ЎФА биринчи вице-президенти Равшан Эрматов ҳам шу ерда турибдилар. Ниятимиз жиддий: келаси йили «Қўқон-1912» жамоасини ҳам ғолиблар сафида элитага қайтармоқчимиз. Насиб қилса, Фарғонани Ўзбекистоннинг ҳақиқий футбол пойтахтига айлантирамиз!», — дея таъкидлади вилоят ҳокими.
Меҳмон гуруҳидаги фойдаланувчилар ушбу мақолага изоҳ қолдира олмайди.
