Жаҳон чемпионати саралаш баҳслари доирасида кечган Черногория ва Хорватия терма жамоалари ўртасидаги учрашув нафақат голларга бой ўйин, балки таъсирли воқеа билан ҳам ёдда қолди.
Драматик камбэк
Меҳмонда ҳаракат қилган Хорватия терма жамоаси ўйин давомида 0:2 ҳисобида ортда қолаётган эди. Бироқ, якунда хорватлар ирода намойиш этиб, вазиятни бутунлай ўзгартиришга ва 3:2 ҳисобида ғалаба қозонишга муваффақ бўлишди.
Стадионни жунбушга келтирган лаҳза
Учрашувнинг 78-дақиқасида, натижа хорватлар учун турнир нуқтаи назаридан катта аҳамият касб этмаётган бир паллада майдонга тирик афсона — Лука Модрич туширилди. Шу онда бутун стадион рақиб футболчиси эканлигига қарамай, уни тик туриб, давомли қарсаклар билан қарши олди.
Модричнинг ҳайрати
Ўйиндан сўнг тажрибали ярим ҳимоячи мухлисларнинг бундай илиқ муносабатидан ҳайратда қолганини яшириб ўтирмади.
«Тўғриси, дастлаб бу олқишлар айнан менинг шарафимга янграётганини тушунмай қолдим, вазиятни англаш учун бироз вақт керак бўлди. Бундай ҳурмат учун улардан чин қалбимдан миннатдорман. Футболга бўлган чексиз муҳаббат менга ҳамон олға интилиш ва курашиш учун куч бағишлайди», — дея Модричнинг сўзларидан иқтибос келтиради Pianetamilan.it нашри.
«Дерби делла Мадоннина» олдидан
Эслатиб ўтамиз, айни дамда «Милан» шарафини ҳимоя қилаётган Лука Модрич бугун тунда жиддий синов қаршисида туради. Унинг жамоаси А Сериянинг 12-тури доирасидаги марказий баҳсда ҳамшаҳарлари — «Интер» билан куч синашади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
