«Манчестер Сити»нинг қудратли ҳужумчиси Эрлинг Ҳоланд майдондагина эмас, интернет оламида ҳам ўзининг “тўхтатиб бўлмас” тезлиги ва оммабоплигини яна бир бор намоён қилди. Норвегиялик суперҳужумчининг YouTube канали атиги 35 кун ичида 1 миллиондан ортиқ обуначига эга бўлди — бу футболчилар орасида камдан-кам кузатиладиган натижа.
Ҳоланд ўз каналидаги биринчи видеосини 23 октябр куни жойлаганди. Ҳозирча у жами учта роликни эълон қилган бўлса-да, мухлислар сонининг метеор тезлигида ўсиши унинг қанчалик ҳайратомуз обрў-эътиборга эга эканини кўрсатмоқда.
Шунинг эвазига YouTube платформа қоидаларига кўра, 25 ёшли футболчига расман «Олтин кнопка» тақдим этилади. Агар канал аудиторияси 10 миллионга етса, у яна бир нуфузли мукофот — «Бриллиант кнопка» билан ҳам тақдирланиши мумкин.
Эрлинг Ҳоланд нафақат рақамли майдончада, балки ҳақиқий газонда ҳам ўзининг юксак формасини намоён қилмоқда. У Англия Премьер-лигасининг жорий мавсумдаги 12 учрашувида иштирок этиб, 14 марта рақиб дарвозабонларини “жаримага тортиб” улгурган.
Мухлислар фикрича, Ҳоланднинг YouTube’га кириб келиши унинг ҳаёти ва мамлакатлар ўртасидаги саёҳатларини яқиндан кўриш имконини беради. Яна бир нарса аниқ — футболчи қачон видеоларни кўпайтирса, платформадаги оммавийлашуви янада ошиши табиий.
Тўғриси, Ҳоланд қандай жойда пайдо бўлса, статистика ҳам доим унинг тарафида ишлайди. YouTube ҳам бундан мустасно эмас.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
