«Реал Мадрид» бу ҳафта муҳим синов олдидан яна бир қатор йўқотишлар билан тўқнаш келди. Жамоа ҳимоячиси Раул Асенсио вирусли инфекция туфайли «Жирона»га қарши учрашувда майдонга тушмаслиги деярли аниқ бўлиб турибди. Бу эса Хаби Алонсонинг таркибий режаларига жиддий таъсир кўрсатиши мумкин.
Кечаги машғулотларда жамоанинг яна бир нечта етакчи футболчилари ҳам қатнашмади. Давид Алаба, Дани Карвахал ва ёш ҳимоячи Дин Ҳейсен умумий дастурда кўринмади — бу эса уларнинг ҳолати ҳали кутилган даражада эмаслигини англатади.
Шу билан бирга, мухлислар учун яхши янгилик ҳам бор: Эдер Милитао жароҳатдан кейин майдонга қайтди ва охирги икки машғулотда жамоа билан чекланган режимда бўлса-да, ҳаракат қилди. Агар барча кўрсаткичлар ижобий бўлса, у қайдномадан ўрин олиши мумкин.
Хаби Алонсо Чемпионлар Лигасидаги «Олимпиакос»га қарши драматик ўйинни касаллик сабаб ўтказиб юборган Тибо Куртуага ҳам ишона олади. Белгиялик посбоннинг ҳолати яхшиланган ва у «Жирона»га қарши баҳсда жамоага ёрдам бериши кутилмоқда.
Бундан ташқари, Антонио Рюдигер ва ёш яримҳимоячи Франко Мастантуоно ҳам қайдномага киритилиши мумкин. Аммо уларнинг ўйинда тўлиқ қатнашиши ҳали номаълум. Чунки жароҳатдан тикланишганига қарамай, улар жамоа билан жами бир неча машғулотдагина тўлиқ қатнашишга улгурди.
«Реал» олдинда турган муҳим баҳс арафасида таркиб жиҳатидан жиддий синовдан ўтмоқда. Энди Хаби Алонсо қандай қарор қабул қилиши ва қайси футболчиларни асосий таркибда майдонга тушириши мухлислар учун асосий интрига бўлиб турибди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
