Жаҳон чемпионати–2026 учун қуръа ташланиши барча ўзбек футбол мухлисларини қувонтирди, айниқса Португалия билан тўқнаш келиш имкони ижтимоий тармоқларда катта мулоҳазага сабаб бўлди. Терма жамоамиз яримҳимоячиси Жалолиддин Машарипов ҳам қуръадан кейин ўз фикрлари билан ўртоқлашиб, мухлисларни қувонтирадиган баёнот берди.
Машарипов айтишича, у қуръадан олдиноқ Роналду билан йўллари яна кесишиши мумкинлигини ҳис қилган. Унинг сўзларига кўра, ўзбек мухлислари бундай тарихи бор учрашувни узоқдан кутган ва буни чуқур интизорлик билан орзу қилган.
«Қуръадан олдин Роналду билан яна рўбарў келишимиз мумкинлигини айтгандим. Мухлислар ҳам шуни кутди — Месси ёки Роналдуга қарши ўйнашни. Португалия билан бир гуруҳга тушганимиз — катта омад. Бу бизни руҳлантиради», — деди футболчи.
У, шунингдек, Колумбия термасини юқори баҳолар экан, рақибларимизнинг барчаси жиддий тайёргарлик талаб қилишини таъкидлади.
«Колумбия ҳам ўта кучли жамоа. Биз ўша ерга боргандан кейин биринчи вазифамиз — гуруҳдан чиқиш бўлади. Худо хоҳласа, буни амалга ошира оламиз деб ишонаман», — дея қўшимча қилди Машарипов.
Футболчининг бу фикрлари терма жамоа атрофидаги ижобий кайфиятни янада мустаҳкамлади. Ҳозир барча диққат 2026 йилга қаратилган — ўзбекистонлик футболчилар оламшумул мусобақада ўз сўзини айтишга бел боғлаган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
