Нуфузли Goal нашри 2026 йилги Жаҳон чемпионатида зафар қучиши эҳтимол бўлган терма жамоалар рейтингини эълон қилди. Ушбу рўйхатда Ўзбекистон миллий терма жамоаси 32-поғонани эгаллади ва жамоамизнинг мундиалдаги салоҳияти ҳақида алоҳида таҳлил берилди.
Нашр таъкидлашича, бу натижа ўзбекистонлик футбол мухлислари узоқ муддат интиқ кутиб келган тарихий он билан боғлиқ: мамлакатимиз илк бор жаҳон биринчилиги бўладиган мусобақанинг финал босқичига йўл олди. Аммо бу йўл осон кечмади.
Катанец кетди, Кападзе ишни давом эттирди – йўлланма қўлга киритилди
Саралаш босқичида бош мураббий Сречко Катанец соғлиқ билан боғлиқ қийинчиликлар туфайли вазифасини тарк этди. Январдаги бу ўзгаришдан сўнг, жамоани собиқ футболчи Тимур Кападзе қабул қилиб олди ва Словениялик мутахассис бошлаб берган ишни муваффақиятли якунлашга эришди.
5 июнь куни БААга қарши кечган 0:0 ҳисобидаги муросасиз дуранг Ўзбекистонга тарихий мундиал йўлланмасини тақдим этди. Мана шундай масъулиятли паллада жамоа босимга дош берди ва ўз мақсадига эришди.
Каннаваро қўл остидаги Ўзбекистон – янада жипс ва тактик жиҳатдан кучли
Якуний босқичда эса миллий жамоамизни Италия футболи афсоналаридан бири, жаҳон чемпиони Фабио Каннаваро бошқариши маълум қилинди. Goal'нинг ёзишича, Каннаваро қўл остида жамоа анча жонланган — ўтган ой Ал Айн халқаро кубогида Ўзбекистон аввалига Мисрни мағлуб этди, финалда эса Эронни пенальтилар сериясида ортда қолдириб, мусобақа кубогини қўлга киритди.
Бу ғалабалар терма жамоанинг психологияси, жамоавий ўйини ва тактик қарашларининг тўғри йўналишда шаклланаётганини кўрсатиб турибди.
Плей-оффга чиқиш учун ҳимоянинг роли ҳал қилувчи бўлади
Goal таҳлилчиларига кўра, Ўзбекистоннинг плей-офф умидлари, аввало, ҳимоянинг барқарор ўйинига боғлиқ бўлади. Мудофаа марказида эса “Манчестер Сити” таркибида фаолият юритадиган Абдуқодир Ҳусанов етакчи сифатида майдонга тушиши кутилмоқда.
Унинг зиммасига жуда катта масъулият юкланади — жамоамиз Португалияга қарши ўйинда Криштиану Роналдуни, Колумбияга қарши баҳсда эса Луис Диасни тўхтатиш каби ўта мушкул вазифаларни бажариши талаб этилади.
Фаворитлар ҳам аниқланди
Goal нашрининг тахминларига кўра, Испания, Аргентина ва Англия 2026 йилги мундиалнинг бош фаворитлари сифатида кўрилмоқда. Аммо рейтингда Ўзбекистоннинг жой олиши ҳам жамоамизга бўлган ишонч баландлигидан далолат беради.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
