“Барселона” бош мураббийи Ҳанс-Дитер Флик жамоанинг муҳим фигураларидан бири — Рафинянинг жисмоний ҳолати ҳақида янгилик билан ўртоқлашди. Мураббийнинг айтишича, бразилиялик яримҳимоячи аста-секин формасига қайтаяпти, бироқ ҳали ҳам эҳтиёт чоралари талаб этилади.
Фликнинг таъкидлашича, сўнгги “Атлетико”га қарши ўйин Рафиня учун айниқса оғир кечган:
“Рафиня билан вазият назоратда. У секин-аста тикланяпти, лекин ҳозир унга орттиқча юк туширишни хоҳламаймиз. ‘Атлетико’ билан беллашув барча учун қийин бўлди, аммо айниқса унинг организми учун бу ўта талабчан ўйин бўлди”, — деди мураббий клуб матбуот хизматига.
Жорий мавсум Рафиня “Барса” сафида 11 та ўйинда қатнашиб, 4 та гол урган ва 3 та ассист амалга оширган. Унинг ўйини жамоа ҳужумида муҳим роль ўйнашда давом этмоқда.
Бразилиялик футболчи каталонияликлар билан 2028 йилгача шартнома тузган. “Трансфермаркт” платформасига кўра, унинг бозор қиймати ҳозирда 90 миллион еврони ташкил этади, бу эса уни Европадаги қимматбахо яримҳимоячилардан бирига айлантиради.
Рафинянинг тўлиқ тикланиши жамоа учун албатта катта куч бўлади. Флик эса хавфсизликни биринчи ўринга қўйган ҳолда ўйналадиган минутларни эҳтиёткорлик билан тақсимлаб боришни маъқул кўрмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
