"Сельта" бош мураббийи Клаудио Хиральдес Мадриднинг "Реал" жамоасига қарши ўйинни таҳлил қилди. Виго клуби Ла Лиганинг 15-турида 2:0 ҳисобида зафар қучди.
"Ўтган мавсумда Хетафедаги воқеалар кўпроқ аҳамиятга эга эди, чунки биз Еврокубок йўлланмасини қўлга киритдик. "Сантьяго Бернабеу"да ғалаба қозониш барча учун ёқимли, лекин бу фақат 3 очко ва улар бошқа исталган очколар билан тенг қийматга эга", - дейди Хиральдес "Мундо Депортиво" нашрига.
"Биз яхши ҳимояландик ва бизга ғалаба учун зарур бўлган бироз омад ҳам кулиб боқди. Улар ҳисобни тенглаштириш ёки ғалаба қозониш учун имкониятларга эга бўлди.
Футболчимиз майдондан четлатилгач, тўп билан ёмон ҳаракат қилганимиз сабабли мағлубиятга учрашимиз ҳам мумкин эди." Шунингдек, Хиральдес иккинчи бўлимда елкасини оғритгани туфайли майдонни тарк этган Пабло Дуран ҳақида ҳам тўхталиб ўтди. "У - ҳақиқий жангчи.
У оғриққа дош берди. Кубокдаги ўйиндан кейин энергияни сақлаб қолиш жуда муҳим эди.
Биз имкони борича узоқроқ бардош беришни хоҳладик. Унинг елкаси безовта қилаётган бўлса-да, умид қиламизки, бу жиддий эмас.
У кўрсатган жасорат ва жисмоний ҳаракатлари учун миннатдорман." Хиральдес "Реал" бош мураббийи Хаби Алонсо билан боғлиқ вазиятга муносабат билдириб, унга ҳамдардлик билдирди. "У ҳимоя босқичида ва жароҳатлар билан боғлиқ вазиятларда омадсизликка дуч келмоқда.
Карло Анчелотти билан узоқ вақт ишлагандан кейин мослашиш учун вақт керак. "Реал"га ундан яхши мураббий керак эмас, улар сабрли бўлишлари керак." Ушбу учрашувдан сўнг, "Сельта" 19 очко билан 10-ўринда, "Реал Мадрид" эса 36 очко билан 2-ўринда бормоқда.
Меҳмон гуруҳидаги фойдаланувчилар ушбу мақолага изоҳ қолдира олмайди.
