Яқинда АҚШда бўлиб ўтган “ЖЧ-2026” қуръа ташлаш маросими нафақат футбол оламида, балки юртимизда ҳам катта қизиқиш уйғотди. Миллий терма жамоамизнинг қайси рақибларга дуч келиши мухлислар томонидан ҳаяжон билан кузатилди. Йиллар давомида ёшлар терма жамоамизда муваффақиятли фаолият олиб бораётган тажрибали мутахассис Равшан Ҳайдаров “Sports.uz” сайти орқали қуръа натижалари ва гуруҳимизнинг имкониятлари ҳақида батафсил фикр билдирди.
Ҳайдаровга кўра, маросим ўзига хос услубда ташкил этилган ва барча иштирокчиларда катта интрига уйғотган. Унинг айтишича, биринчи саватдан қайси жамоа рақиб бўлишидан қатъи назар, барибир кучли терма тушиши аниқ эди. Кўплар мезбонлардан бирини рақиб сифатида хоҳлаган бўлсалар-да, қуръа натижаси объектив ва реал баҳоланиши керак.
Унинг фикрича, Ўзбекистон жуда ҳам мос, ўйнаш мумкин бўлган, кураш имконини берувчи гуруҳга тушган. Португалия – юқори савияли, энг кучли термалардан бири. Колумбия ҳам анча кучли рақиб сифатида йиллар давомида ўз номини сақлаб келмоқда. Тўртинчи жамоа номи аниқ бўлгач, таҳлил янада равшанлашади, аммо жаҳон чемпионатида “кучсиз рақиб” деган тушунча умуман мавжуд эмас.
Ҳайдаров таъкидлаганидек, мундиалга борадиган ҳар бир футболчи максимал иштиёқ билан майдонга тушади, бу эса ўйинларни янада кескин ва драматик қилади. Шу боис, Ўзбекистон ҳам рақибларни чуқур ўрганиши, уларга мос ўртоқлик учрашувларини ташкил этиши лозим. Бу борада мураббийлар штаби аллақачон зарур ишларга киришган.
Унинг таъкидлашича, жамоанинг охирги йиллардаги савияси ошгани, Миср ва Эронга қарши ўйинлардаги барқарорлик шунга яққол мисол. “Ҳамма билан ўйнашга кучимиз етади. Энг муҳими – мундиалга яхши формада, соғлом таркиб билан бориш”, – дейди мутахассис.
Қуръа ҳақидаги саволга жавобан у: “Гуруҳимиз мутлақ меъёрда. Ҳатто бундан ҳам қийини чиқиши мумкин эди. Биз рақобат қила оладиган рақиблар билан ўйнаймиз”, – деб маълум қилди.
Фабио Каннаваро ҳақидаги биринчи таассуротларига тўхталар экан, Ҳайдаров жамоадаги кайфият ижобий томонга ўзгараётганини қайд этди. Унга кўра, футболчилар янги мураббийлар штаби олдида ўзини кўрсатиш учун янада кучли иштиёқ билан ҳаракат қилмоқда. Тактик ўзгаришлар ҳозирча катта эмас, аммо жамоанинг руҳий тайёргарлиги сезиларли даражада кўтарилган.
Мутахассис фикрига кўра, Каннаваро каби тажрибали мураббийлар ҳар бир рақиб учун алоҳида тактик йўналиш ишлаб чиқишга қодир. “Бу биз учун жуда муҳим. Янги ғоялар ва замонавий ёндашувлар терма жамоанинг савиясини янада оширади”, – деди Ҳайдаров.
Йигитларнинг мақсади эса аниқ: гуруҳдан муваффақиятли чиқиш ва тарихий натижа қайд этиш.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
