«Ливерпуль» атрофида сўнгги кунларда авж олган муҳокамалар яна давом этмоқда. Жамоа юлдузи Муҳаммад Салоҳнинг кетма-кет уч беллашувда асосий таркибдан четда қолдирилгани ва шундан сўнг клуб ҳақида танқидий фикр билдиргани, табиийки, катта шов-шувга сабаб бўлди. Мисрлик ҳужумчи: «Мен АПЛ чемпиони бўлдим, бу авлодда энг кўп гол уряпман. Нима учун бу вазият шундай якунланиши керак?» деган ибораси билан жамоатчиликни янада қизиқтирди.
Бугун эса Салоҳ Чемпионлар лигасининг 6-турида «Интер»га қарши ўйин учун қайднома рўйхатига ҳам киритилмагани маълум бўлди. Бу ҳол, албатта, унинг атрофидаги саволларни янада кўпайтирди.
Бироқ жамоа бош мураббийи Арне Слот вазиятни бошқа ракурсда баҳолади. Унинг таъкидлашича, Салоҳнинг танқидлари унинг шахсий обрўсига ҳеч қандай салбий таъсир кўрсатмаган ва кўрсатмайди.
«Мен албатта тинч, мулойим инсонман, лекин бу заифман дегани эмас. Агар футболчи очиқ танқид билдирса, клуб ва мен бу ҳолатга муносабат билдиришимиз шарт. Биз қандай қадам қўйганимизни ўзингиз кўриб турибсиз — у бу ўйинда иштирок этмаяпти.
Мен обрўйимга путур етди, деб ўйламайман. Рости, бундай ҳиссиёт йўқ», — деди Слот матбуот анжуманида.
Мураббийнинг бу баёнотидан англашиладики, клуб ички интизом ва умумий стратегиядан орқага қайтмасдан, вазиятни ички тартиб асосида ҳал этмоқда. Слот шахсан ўз нуфузига шубҳа қилмайди, аксинча, жамоадаги барқарорликни биринчи ўринга қўяди.
Салоҳ эса бу жараёнда қандай қарор қабул қилиши, клуб билан муносабатлари қандай йўналиш олиши — бугунги куннинг энг катта интригасидир. Мухлислар эса бу вазиятнинг қандай ечим топишини ҳаяжон билан кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
