«Реал Мадрид» бош мураббийи Хаби Алонсо Чемпионлар лигасида «Манчестер Сити»га қарши кечган беллашувдан сўнг унча-мунча мутахассис айтмайдиган очиқ фикрлари билан ўртоқлашди. Унинг таъкидлашича, натижа қониқарли бўлмаганига қарамай, жамоа майдонда бор кучини ишга солган.
Алонсонинг айтишича, «қироллик клуби» ўйинни актив бошлаб, ҳисобни очгани — тасодиф эмас, балки режага асосланган ҳаракат эди. Бироқ рақиб жамоа 10 дақиқа ичида бурчак зарбаси ва пеналтидан фойдаланиб, вазиятни ўз фойдасига буриб юборди.
«Бизда афсусланадиган ҳеч қандай жиҳат йўқ. Йигитлар охиригача матонат билан курашди, ўйинни яхши бошладик ва илк голни урдик. Аммо рақиб икки стандарт ҳолатдан сўнг қисқа фурсатда ҳисобни ўзгартира олди. Жуда кескин, ёнма-ён курашлар остида ўтган учрашув бўлди.
Гол ўтказган вазиятларда керакли даражада пухта ҳаракат қила олмадик, шуни тан олиш керак. Бироқ шу ҳолатлардан кейин ҳам жамоа таслим бўлмади ва ўйинни тарк этмади. Имкониятлар бўлди, фақат ҳал қилувчи зарбада бир оз аниқлик етишмади. Шунга қарамай, мен йигитларнинг бирортасини айбламайман», — деди Алонсо.
Ҳозирги кўринишдан маълумки, мураббий жамоага ишонади, жамоа эса мураббийнинг ғояларига. Беллашув натижаси яхши бўлмаганига қарамай, «Реал»да қайтмас руҳ, юксак ишонч ва кейинги турларда ўзини тиклаб олишга куч борлиги кўриниб турибди.
Мухлислар эса яна бир бор кўрди: бу жамоа ҳар қандай шароитда охиригача курашади.
Меҳмон гуруҳидаги фойдаланувчилар ушбу мақолага изоҳ қолдира олмайди.
