Саудия Арабистони валиаҳд шаҳзодаси Муҳаммад ибн Салмон дунё футболидаги энг машҳур брендлардан бири — «Барселона» клубини сотиб олиш ниятида экани ҳақида хабарлар тарқалмоқда. El Chiringuito нашри журналисти Франсуа Галярдо маълум қилишича, эҳтимолий битим қиймати тахминан 10 миллиард евро атрофида баҳоланмоқда.
Манбада таъкидланишича, ушбу улкан келишув йўлидаги энг асосий тўсиқ «Барселона»нинг ўзига хос бошқарув модели — «сосёс» тизими ҳисобланади. Маълумки, Каталония клуби оддий хусусий мулк эмас: унинг аъзолари жамоанинг жамоавий эгалари саналади ва айнан улар раҳбариятни сайлаш, муҳим қарорларни қабул қилиш ҳамда клуб тақдирига дахлдор масалаларни ҳал этиш ҳуқуқига эга.
Бу эса клубни тўлиқ сотиб олиш жараёнини анча мураккаблаштиради. Шу боис, Goal портали маълумотларига кўра, Саудия Арабистони Давлат инвестиция жамғармаси альтернатив вариантни ҳам кўриб чиқмоқда. Яъни, клубни тўлиқ харид қилиш ўрнига, «Барселона»нинг алоҳида тижорий ёки медиа йўналишидаги бўлинмаларига йирик сармоя киритиш имконияти ўрганилмоқда.
Айни пайтда «кўк-анорранглилар» молиявий жиҳатдан қийин даврни бошдан кечирмоқда. Очиқ манбаларга кўра, клубнинг умумий қарзи 2,5 миллиард еврога яқинлашган. Ана шу ҳолат Саудия сармоядорларининг қизиқишини янада кучайтирган омиллардан бири сифатида баҳоланмоқда.
Мутахассислар фикрича, агар бундай келишув амалга ошса, у нафақат «Барселона», балки бутун Европа футболи молиявий харитасини ўзгартириб юбориши мумкин. Бироқ «сосёс» тизими сабабли мазкур жараён тез ва осон кечмаслиги аниқ. Шунинг учун яқин ойларда ушбу масала атрофида яна кўплаб қизиқарли янгиликлар кутилиши шубҳасиз.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
