Усмон Дембеле The Best талқинига кўра йилнинг энг яхшиси деб топилди. У “Олтин тўп”ни ҳам қўлга киритганидан кейин бу эътирофнинг ўзи ажабланарли эмас: 35 гол, 16 ассист, “ПСЖ” билан требл ва устига-устак Чемпионлар лигаси.
Савол Дембеле муносиблигида эмас, у бунга лойиқ. Савол бошқа: нега ФИФА ўз мукофотини ўзи қадрсизлантирмоқда?
Ўтган йили ташкилот тўғри йўл тутганди. Родри “Олтин тўп”ни олди, The Best эса Винисиусга насиб этди.
Икки муносиб футболчи, икки хил танлов ва натижада барлару гуруҳларда бир ой давом этган баҳслар. Мадрид France Football маросимини намойишкорона тарзда эътиборсиз қолдирди, Родри эса хочсимон боғлам жароҳатидан кейин хассада совринни олишга чиққанди.
Бу соф футбол театри эди: эътибор ҳам бўлди, ҳар икки мукофотнинг ҳам қиймати ошди. 2025 йилда эса танлов учун номзодлар етарли эди: Витинья ақл бовар қилмас кўрсаткичлари билан, Рафинья кучли мавсумдан сўнг, “Ливерпуль” сафида яна голларини давом эттирган Салоҳ, ёш Ямал.
Манёвр қилиш имконияти жуда катта. ФИФА Дембеледен бошқа исталган футболчини танлаганида ҳам, муҳокамалар портлаши аниқ эди.
Бироқ ташкилот France Football ортидан содиқ юрди ва амалда ўз маросимини “Олтин тўп”нинг бир ой кечиккан иловасига айлантириб қўйди. Унда нега алоҳида мукофот сифатида мавжуд бўлиши керак?
Овоз бериш баённомалари эса тушунмовчиликни янада кучайтирди. Александр Головин биринчи ўринга Мбаппени қўйди, Валерий Карпин эса энг юқори баҳони Витиньяга берди — ҳар иккиси якуний қарордан кўра мантиқийроқ кўринади.
Журналист Олег Кошелев учликка Салоҳни киритди, бу мисрлик футболчининг рамзий терма жамоага киритилмагани фонида янада адолатлироқ туюлди. Рамзий терма жамоа ҳам саволлар қолдирди: Палмер бор, Рафинья йўқ.
Мойсес Кайседо Беллингем билан бир хил очко йиғди, аммо рўйхатда инглиз бор-у, эквадорлик четда қолди. Регламентга кўра, очко тенг бўлса, экспертлар овози устун ҳисобланади, Кайседода у кўпроқ — барибир таркибдан жой олмади.
ФИФА эса буни изоҳлашга ҳам уринмади. Маросимнинг энг нозик жиҳати ҳам кўздан қочмади.
“ПСЖ”да Дембеле билан бир жамоада ўйнайдиган Ашраф Ҳакими биринчи ўринга “Реал”даги яқин дўсти Мбаппени қўйди. Дембеле марокашлик футболчи рўйхатида фақат иккинчи бўлди.
Париж мухлислари кескин муносабат билдирди: “хоин”, “дўстликни жамоадошидан устун қўйди”, “энди уни Мадридга қайтаринг”. RMC Sport Дембеледен тақдирлашдан кейинги сўзларини келтиради: “Оғир меҳнат ўз самарасини беради.
Жанни Инфантинога раҳмат, туғилган кунимда юборган хабарингизни олдим”. Бироқ бу гаплар бошқаларнинг қандай овоз бергани ҳақидаги шовқин ичида йўқолиб кетди.
Месси учликни тўлиқ топди: Дембеле, Мбаппе, Ямал. Криштиану Роналду ўрнига овоз берган Бернарду Силва эса топ-3 га “ПСЖ”нинг уч футболчисини киритди: Витинья, Нуну Мендеш ва Дембеле.
Мураббийлар номинациясида Луис Энрике ғолиб бўлди: у Чемпионлар лигаси финалида “Интер”ни 5:0 ҳисобида тор-мор этганидан сўнг совринни олди. Унинг жамоаси чемпионат, икки кубок, Чемпионлар лигаси ва УЕФА Суперкубогини ютди.
Бироқ бу ерда ҳам ҳаммаси олдиндан маълум, мантиқан тўғри ва шу билан бирга зерикарли кўринди. ФИФА футбол байрамини ҳам, баҳс-мунозарани ҳам уюштириши мумкин эди.
Бунинг ўрнига маросим расмийлаштирилган, нотариал тасдиқдек совуқ соврин топшириш актига айланди. Дембеле орзу қилинган мавсумни ўтказгани — факт.
Аммо жамоавий спортдаги индивидуал мукофотлар баҳсга материал бериш учун ҳам мавжуд. ФИФА бундан ўзи воз кечди.
Энди The Best иккинчи даражали совриндек кўринмоқда: у фақат France Football ҳукмини бир ойдан кейин тасдиқлаб беради, холос. Бунинг маъноси нимада?
Доҳагаги маросим бир нарса билан эсда қолади: ФИФА интрига яратиш имкониятини бой берди ва ўзига ўзи зарар етказди. Дембеле эса энди нега ўз клубининг ҳимоячиси уни энг яхшиси деб билмаганини изоҳлашига тўғри келади.
Арман Тигранянц “Zamin”ни Telegram'да ўқинг!
Ctrl
Enter
Хато топдингизми?
Иборани ажратиб Ctrl+Enter тугмасини босинг Мавзуга оид янгиликлар
Маълумот
Меҳмон гуруҳидаги фойдаланувчилар ушбу мақолага изоҳ қолдира олмайди.
Меҳмон гуруҳидаги фойдаланувчилар ушбу мақолага изоҳ қолдира олмайди.
