Жароҳатлардан тикланган ПСЖ ҳужумчиси Усмон Дембеле мураббийлар штаби уни чекланган даражада майдонга тушираётганидан ҳайратда. Бу ҳақда Canal+ хабар бермоқда.
Дембеле Қитъалараро кубокда "Фламенго"га қарши учрашувнинг иккинчи бўлимида захирадан майдонга тушди ва ўйиндан кейинги пенальтилардан бирини аниқ ижро эта олмади. Бироқ бу жамоанинг ғалабасига халал бермади.
Шунга қарамай, ҳужумларни якунлашдаги мунтазам муаммолар унинг майдондаги ролини ҳозирча ноаниқ қилиб турибди. Манбага кўра, футболчи ва мураббийлар штаби ўртасидаги кескинлик тобора ортиб бормоқда.
Дембеле соғлиқ билан боғлиқ муаммолар туфайли мавсум давомида вақти-вақти билан сафдан чиққан. У барча мусобақаларда 13 та учрашувда қатнашиб, 3 та гол урди ва 3 та голли узатмани амалга оширди.
Мураббийлар штаби унинг старт таркибида ўйинни бошлашга ҳали тўлиқ тайёр эмаслигини таъкидламоқда. Футболчининг ўзи эса бошқача фикрда: Дембеле керакли ритм ва ишончни топиши учун айнан асосий таркибда кўпроқ ўйнаши зарур, деб ҳисоблайди.
Меҳмон гуруҳидаги фойдаланувчилар ушбу мақолага изоҳ қолдира олмайди.
