Ўзбекистон миллий терма жамоаси бош мураббийи Фабио Каннаваро Италия матбуоти билан суҳбатда ўз ватани футболида йиллар давомида тўпланиб қолган муаммолар ҳақида очиқ фикр билдирди. 2006 йилги жаҳон чемпиони бўлган мутахассиснинг таъкидлашича, бугунги Италия футболида энг оғриқли масалалардан бири — маҳаллий, айниқса ёш италиялик футболчиларнинг камлиги ҳисобланади.
Каннаваро сўзларига кўра, А Серия клубларида легионерларга ҳаддан ташқари таяниш миллий терма жамоа учун жиддий оқибатларга олиб келмоқда. Майдонда етарлича тажриба орттира олмаётган ёш футболчилар келажакда терма жамоа учун рақобатбардош захирага айлана олмаяпти. Бу эса мураббийларни таркибни шакллантиришда чекланган имкониятлар олдида қолдиряпти.
Мутахассис ҳозирги Италия чемпионатини аввалгидан ҳам диққат билан кузатаётганини таъкидлади. Унинг фикрича, замонавий Италия футболи ортиқча мураккаб тактик ечимларга берилиб кетган. Бутун майдон бўйлаб шахсий қўриқлашга асосланган ўйин услуби деярли барча жамоаларда қўлланилаётгандек таассурот уйғотмоқда.
Каннаваро Жан Пьеро Гасперинининг иш услубини юқори баҳолаб, унга катта ҳурмат билан муносабатда эканини яширмади. Бироқ у шу билан бирга муҳим жиҳатга эътибор қаратди: тактика устун қўйилиб, футболчининг индивидуал техникаси иккинчи ўринга сурилмоқда. Бу эса италия футболининг анъанавий кучли томонларига салбий таъсир кўрсатяпти.
Мутахассис ўтмиш билан ҳозирни солиштириб, жуда таъсирли мисол келтирди. Унинг сўзларига кўра, 2006 йилги жаҳон чемпионлигигача бўлган даврда терма жамоага чақирилган футболчиларни кўрганида, ҳар сафар ҳайратланиш мумкин эди. Бугун эса кўплаб футболчилар ҳали ўзини тўлиқ намоён эта олмаган ҳолда миллий жамоага жалб этилаётгани сезилади.
Каннаваро ёш футболчиларни қурилаётган уйга қиёслади. Унинг таъкидлашича, пойдевор мустаҳкам бўлмаса, бинo ҳам барқарор бўлмайди. Ёшлик даврида техника биринчи ўринда туриши шарт, тактика эса кейинроқ келади. Айнан шу йўналишдагина футболчи тўлиқ шаклланади.
Эслатиб ўтиш жоиз, Фабио Каннаваро жорий йил октябрь ойида Ўзбекистон миллий терма жамоаси бош мураббийи этиб тайинланган. Айни пайтда у жамоани 2026 йилги жаҳон чемпионатига тайёрлаш билан банд. АҚШ, Канада ва Мексикада бўлиб ўтадиган мундиалда термамиз Португалия ва Колумбия жамоалари билан бир гуруҳда баҳс олиб боради. “К” гуруҳининг тўртинчи иштирокчиси эса плей-офф баҳсларидан сўнг аниқланади.
Каннаваронинг очиқ ва танқидий фикрлари нафақат Италия, балки бутун жаҳон футболи учун ҳам муҳим хулосалар чиқаришга ундайди.
“Zamin”ни Telegram'да ўқинг!
