Винисиус Жуниор 2026 йилги Испания Суперкубоги финалида «Реал Мадрид»нинг энг муҳим фигураси бўлди. Саудия Арабистонида кечган «эл класико»да «Барселона» 3:2 ҳисобида ғалаба қозониб, совринни қўлга киритди. Мағлубиятга қарамай, бразилиялик вингер клуб тарихига яна бир бор кириб, аввал Криштиану Роналду ва яна икки «Реал» афсонасига тегишли кўрсаткични такрорлади. Бу ҳақда euro-football.ru хабар беради.
Якшанба кунги финал «Реал» ва «Барселона»нинг Суперкубокдаги кетма-кет тўртинчи тўқнашуви бўлди. Ҳисоб 0:1 бўлиб турган паллада Винисиус марказдан тўпни олиб, яккама-якка юришда Жюл Кунде устидан устун келди ва 45+2-дақиқада ажойиб зарба билан ҳисобни тенглаштирди.
Ушбу гол Винисиуснинг финаллардаги самарадорлигини янада мустаҳкамлади: у «Реал» сафида финалларда энг кўп натижали ҳаракат (гол+пас) амалга оширган футболчилардан бирига айланди. 2018 йилда «Фламенго»дан кўчиб ўтганидан бери у 15 та финалда 9 та гол урди ва 7 та ассист берди — жами 16 та натижали ҳаракат.
Криштиану Роналду ҳам «Реал»даги 9 мавсумида финалларда худди шунча — 16 та натижали ҳаракат қайд этган. Португалиялик юлдуз «Лос Бланкос» сафида 18 та финал ўйнаб, 15 та гол урган ва битта голга узатма берган — 2014 йилги Чемпионлар Лигаси финалида «Атлетико»га қарши учрашувда Марселога ассист қилган.
Винисиус шу тариқа яна икки афсона — Карим Бензема (29 та финал) ва Ференс Пушкаш (8 та финал) билан ҳам бир қатордан жой олди. Биринчи ўрин тўрт ҳужумчи ўртасида тенг бўлинган, Альфредо Ди Стефано эса 15 та финалда 13 та натижали ҳаракат билан ортда турибди. Винисиус кейинги финалдайоқ гол уриш ёки ассист бериш орқали бу рўйхатда якка етакчига айланиш имкониятига эга.
Шу билан бирга, Винисиуснинг финалдаги умумий муваффақият кўрсаткичи ҳали ҳам Роналду даражасига чиқмаган. Улар ўйин услуби жиҳатидан ҳам турлича: Винисиус кўпроқ дриблинг ва вазият яратиш орқали ажралиб турса, Роналду замонавий футболнинг энг сермаҳсул тўпурарлари қаторида танилган.
Роналду «Реал» сафида ўйнаган 18 та финалнинг 14 тасида ғолиб чиққан, жумладан, Чемпионлар Лигаси финалидаги барча тўрта ўйин ҳам ютуғи билан якунланган. У фақат 2013 йилги Испания Кубоги финалида «Атлетико»га, шунингдек, 2011 йилда «Барселона»га ҳамда 2014 ва 2015 йилларда «Атлетико»га қарши Суперкубокларда имкониятни бой берган — натижада ғалаба фоизи 77,7%.
Винисиус эса ҳозирча 15 та финалда 10 марта ғалаба қозонган ва 5 марта ютқазган. Мағлубиятларнинг тўрттаси Испания Суперкубогига (2021, 2023, 2025, 2026), биттаси эса 2025 йилги Испания Кубоги финалига тўғри келган. Бразилиялик футболчининг финаллардаги ғалаба улуши ҳозирча 66,6%.
“Zamin”ни Telegram'да ўқинг!
