Англия Лига кубоги ярим финал босқичидаги илк беллашувда “Манчестер Сити” сафарда “Ньюкасл”ни 2:0 ҳисобида енгиб, жавоб ўйини олдидан ўзи учун анча қулай натижа яратиб олди. Қаттиқ босим, шовқинли трибуналар ва жисмонан бақувват рақиб — ҳаммаси бор эди. Аммо “шаҳарликлар” айнан шу шароитда ҳам совуққонлик билан вазифани бажарди.
Учрашувдан кейин “Сити” ҳимоячиси Макс Аллейн Абдуқодир Ҳусанов билан марказда жуфтлик бўлиб ўйнаётгани ҳақида фикр билдирди. Унинг сўзларидан билинишича, икки ҳимоячи орасида тушуниш ва алоқа тез шаклланяпти.
“Жамоадан жуда фахрланаман. Ҳусанов билан яхши алоқа ўрнатиб улгурдик, у билан бирга ўйнаш жуда ёқимли. Келгусида ҳам бирга кўп ўйнашни интиқлик билан кутяпман”, — деди Аллейн.
Аллейннинг таъкидлашича, сафардаги бу ғалаба ҳеч кимга осон бўлмаган. У айниқса руҳий томонга урғу берди: майдонда тўлиқ концентрация, эътиборни фақат футболга қаратиш ва турли чалғитувчи омилларни четга суриш — шу нарса ҳал қилувчи бўлган.
“Осон бўлмади. Менимча, энг асосийси — футболга тўлиқ эътибор қаратиш ва бошқа чалғитувчи омилларни четга суриш. ‘Ньюкасл’ жисмонан кучли ва қийин жамоа. Стадион жуда шовқинли, бу ерга келиш осон эмас. Аммо ўйиндан катта завқ олдим”, — дея қўшимча қилди у.
Албатта, бу гаплар ҳаводан олинган эмас. Чунки ушбу баҳсда ўзбекистонлик ҳимоячи Абдуқодир Ҳусанов асосий таркибда майдонга тушиб, 90 дақиқа тўлиқ ҳаракат қилди. Унинг ишончли ўйини Sofascore томонидан 8,1 баллга баҳоланди ва ҳамюртимиз учрашувнинг энг яхши футболчиси деб топилди.
Қисқаси, “Сити” ҳимоясида янги жуфтлик секин-аста “темир девор”га айланяпти. Мухлислар эса энди бир нарсани кутяпти: жавоб ўйинида ҳам шу ишонч, шу характер, шу барқарорлик давом этсин.
“Zamin”ни Telegram'да ўқинг!
