Англия Премьер-лигасининг жорий мавсуми кўплаб кутилмаган воқеаларни тақдим этди: кучли “Арсенал”, янгича “Манчестер Сити”, ёрқин “Астон Вилла” ва бошқа кўплаб интрига. Аммо сўнгги йилларда тез-тез учраётган ҳолат яна такрорланди: навбатдаги қадамни юқорига ташлайди, деб ўйланган айрим жамоалар бирданига пастга қулаб тушди. Шу сабаб “Евро-Футбол.Ru” жорий кампанияда натижалари билан кўнгилдагидек таассурот қолдирмаётган клубларни ажратиб кўрсатди. Бу ҳақда euro-football.ru хабар беради.
“Ливерпул”
Гапни амалдаги Англия чемпионидан бошлаймиз. Ўтган мавсумдаги ишончли ғалабадан кейин “Ливерпул” Арне Слот даврида жуда катта трансфер кампанияси ўтказди — Юрген Клопп вақтида бундай миқёс бўлмаган. Шундай харажатлардан сўнг мухлислар ва мутахассислар яна ўтган йилги даражадаги натижаларни кутди. Бошланиш эса аъло бўлди: барча турнирларда кетма-кет саккиз ғалаба. Бироқ кейин жамоа даҳшатли мағлубиятлар сериясига тушиб қолди: 12 ўйинда 9 та ютқазиш “қизиллар”ни жадвал ўрталарига улоқтирди. Декабр бошидан мерсейсайдликлар ўзига кела бошлади — ўшандан бери атиги икки марта ютқазди, аммо дуранглар жуда кўп бўлди. Ҳозир “Ливерпул” АПЛда фақат 6-ўринда. Агар клуб Чемпионлар лигасига йўлланма ололмаса, улкан трансфер сарфи фонида бу ҳақиқий муваффақиятсизлик бўлади.
“Тоттенхэм”
Ўзини гранд сифатида кўрсатадиган яна бир клуб, аммо “Ливерпул”дан фарқли равишда, “Тоттенхэм” инқирози иккинчи мавсумдирки давом этмоқда. Ўтган чемпионатда “шпорлар” клуб тарихидаги энг ёмон натижалардан бирини қайд этиб, 17-ўринни эгаллаган. Шунга қарамай, лондонликлар сенсацион тарзда Европа лигасини ютди, бироқ бу ҳам Анже Постекоглуни истеъфодан қутқара олмади. Жамоани оёққа турғизиш вазифаси “Брентфорд”да йиллар давомида самарали ишлаган Томас Франкка топширилди. Дастлаб ҳаммаси яхши кўринганди, кейин муаммолар яна қайтди. Қизиғи шундаки, Еврокубокларда “Тоттенхэм” яна ўзини топди — Чемпионлар лигаси умумий босқичини кучли саккизликда якунлаб, тўғридан тўғри 1/8 финалга чиқди. АПЛда эса жамоа 17-поғонада бормоқда. Яқинда “Ньюкасл”га уйда 1:2 ҳисобида ютқазилгач, Франк ҳам истеъфога чиқарилди ва энди “шпорлар” яна янги мураббий излашига тўғри келади. Узоқ давом этаётган инқироздан чиқариш учун раҳбарият ёзги трансфер ойнасида жиддий харажат қилишига тўғри келиши аниқ.
“Ньюкасл”
Ўтган мавсумда АПЛни 5-ўринда тугатиб, Чемпионлар лигасига чиққан “Ньюкасл”дан бу йил кейинги қадам кутилганди. Эдди Хау клубда анча вақтдан бери ишлайди, аммо кўпчилик унинг “қарғалар”даги кунлари саноқли, деб ҳисобламоқда. Атрофдагилар Хау мавсум якунида кетиши мумкинлигини айтмоқда, чунки жамоа барқарорликни топа олмади. “Ньюкасл” тўртта ғалабадан кейин олти ўйиндан иборат омадсиз серияга ҳам тушиб қолиши мумкин — бунга кўп жароҳатлар ва молиявий чекловлар каби объектив сабаблар ҳам бор.
“Кристал Пэлас”
“Кристал Пэлас”ни тарихий ютуқларга олиб чиққан Оливер Гласнер жамоаси билан бирга аста-секин пастга тушаётгандек. Эслатиб ўтамиз, “бургутлар” ўтган мавсум Англия Кубогини ют иб, финалда “Манчестер Сити”ни ҳам мағлуб этган, мавсум бошида эса мамлакат Суперкубоги учун баҳсда “Ливерпул”ни ҳам енгганди. Бироқ етакчилар аста-секин жамоани тарк этмоқда, австриялик мутахассис эса мавсумни катта мотивациясиз якунлаётгандек кўринади. “Кристал Пэлас” омон қолиш учун курашмаяпти, бироқ Еврокубоклар зонаси ҳам ҳозирча узоқ кўринади.
“Ноттингем Форест”
Жорий АПЛ мавсумининг энг катта ҳафсалани пир қилган жамоаси бўлса керак. “Ноттингем Форест” ўтган мавсум Нуну Эшпириту Санту билан медаллар учун курашди, аммо якунда охирги босқичда имкониятни бой бериб, Чемпионлар лигасига чиқа олмади. Шунга қарамай, Еврокубок йўлланмаси ҳам жамоа учун улкан ютуқ эди — кўпчилик уларга омон қолиш учун курашни башорат қилганди. Янги кампанияда “ўрмончилар” ҳеч бўлмаганда ўртамийона жамоа сифатида мустаҳкамланади, деган фикр бор эди, аммо мавсум давомида уч марта мураббий алмашгани вазиятни издан чиқарди. Ҳозир “Ноттингем Форест”нинг энг реал мақсади — келаси йил ҳам элита дивизионида қолиш.
Муаллиф: Дмитрий Миляев
“Zamin”ни Telegram'да ўқинг!
