Миландаги Сан-Сиро стадионида ўтган Қишки Олимпия ўйинлари очилиш маросимида кутилмаган, аммо жуда ҳам таъсирли манзара кузатилди. Россиялик Анастасия Кучерова маросим пайтида Украина терма жамоаси табличкасини кўтариб чиққани ҳақида Instagram саҳифасида ёзди. У Associated Press агентлигига берган интервюсида бу қарорни нега қабул қилганини ҳам очиқ тушунтирган.
Қизнинг айтишича, Украина спортчилари билан ёнма-ён юриб борганда, уларнинг ҳар қандай россияликка нисбатан қаттиқ ҳиссиётда бўлишга ҳақли эканини янада чуқурроқ англайсан. Шунга қарамай, у “ҳамма одамлар ҳам бир хил фикрламаслиги”ни кўрсатиш учун ҳеч бўлмаганда кичик қадам ташлаш муҳим, деб ҳисоблаган.
APнинг аниқлашича, Кучерова 2018 йилдан бери Россияга бормаган, 14 йилдан буён Миланда яшайди ва у ерда архитектор бўлиб ишлайди. Энг қизиғи — Украина жамоаси табличкасини кўтариб чиқиш ташаббуси айнан ундан чиққан. Аввалига мамлакатлар кўнгиллиларга тасодифий тақсимланиши керак эди, кейин эса хореограф ким қайси давлат билан чиқишни хоҳлашини сўраган — шу пайтда РФда туғилган қиз Украинани танлаган.
Маросимда Кучерова узун кумушранг пуховикда табличкани кўтариб олган ҳолда олдинда юрган, унинг ортидан эса беш нафар украин спортчиси қадам ташлаб борган. Улар орасида конкичи Елизавета Сидорко ва фигурист Кирилл Марсак ҳам бўлган. Матнда келтирилишича, ҳар икки спортчининг отаси ҳозир фронтда.
Кучерованинг сўзларига кўра, чиқишдан олдин спортчилар унинг рус эканини сезиб қолган ва унга рус тилида мурожаат қилган. У буни руслар ва украинлар ўртасидаги “чуқур боғлиқлик” аломати деб қабул қилган ва уруш бўлмаганда бу алоқа сақланиб қолиши ҳам мумкин эди, деган фикрни айтган. Ўша лаҳзада у орқага ўгирилиб, нимани дейишни билмай қолган, кейин эса шунчаки бутун стадион уларни тик турган ҳолда олқишлаётганини айтган. Томошабинлар жамоани қўллаб-қувватловчи қичқириқлар билан қарши олганда, у ўзини тийиб тура олмай йиғлаб юборганини, катта қора кўзойнак ортида кўз ёшларини беркитишга уринганини ҳам тан олган.
Шу билан бирга, Кучерова айтган гаплари Украинага эмас, Россияда қолган таниш-билишларига зарар етказиши эҳтимоли борлигини тушунишини ҳам таъкидлаган. Лекин у ўз позициясини шундай изоҳлаган: агар демократик давлатда яшаб, эркинликларга эга инсон қўрқса, демак, режим мақсадига етган бўлади.
Бу воқеа спортдаги ғалаба-мағлубиятдан ташқари, одамнинг ичкарисидаги танлов ҳам баъзан қанчалик қаттиқ “садо” беришини кўрсатди. Кимдир буни “кичик қадам” дейди, кимдир “катта ишора” — аммо барибир бу саҳна ҳали узоқ муҳокама қилинади.
“Zamin”ни Telegram'да ўқинг!
