Халқаро футбол ассоциациялари федерацияси (ФИФА) президенти Жанни Инфантино 2026 йилги жаҳон чемпионати финалида тарихда илк бор танаффус вақтида мусиқий шоу ташкил этилишини маълум қилди.
Мусобақанинг ҳал қилувчи учрашуви 19 июль куни АҚШнинг Ню-Жерси штатидаги «МетЛайф» стадионида бўлиб ўтади. Ушбу финал нафақат спорт, балки шоу-индустрия нуқтайи назаридан ҳам катта воқеага айланиши кутилмоқда.
Инфантинонинг айтишича, танаффусда бир нечта машҳур санъаткорлар иштирокида катта саҳна намойиши ўтказилади. У бу лойиҳа тарихдаги энг йирик спорт-шоу бўлишини таъкидлади:
— Бу футбол бўйича жаҳон чемпионати финали танаффусидаги илк шоу бўлади. Ҳозирча иштирокчилар номини ошкор қила олмайман, аммо бир нечта санъаткорлар саҳнага чиқади. Бу сайёрадаги энг катта ва ҳақиқий фантастик шоу бўлади, — деди ФИФА раҳбари.
Эслатиб ўтамиз, 2026 йилги жаҳон чемпионатига учта давлат — АҚШ, Канада ва Мексика мезбонлик қилади. Бу формат турнир тарихидаги энг йирик географик қамровга эга мусобақа бўлади.
“Zamin”ни Telegram'да ўқинг!
