"Бавария Мюнхен" "ВфБ Штутгарт"ни 4:2 ҳисобида мағлуб этиб, Бундеслиганинг 35-мартагалик чемпионлик унвонини қўлга киритди. Аммо Саид машғулотда юзага келган кутилмаган жароҳат жамоа кайфиятини туширди.
Ҳужумкор яримҳимоячи Серж Гнабри пенальти машқи вақтида аддуктор мушагини жароҳатлади. У "Штутгарт" билан ўйинни ўтказиб юборганидан ташқари, энди АҚШ, Канада ва Мексикада ўтадиган Жаҳон чемпионатида Германия терма жамоаси таркибида иштирок этиши ҳам шубҳа остида.
Мураббий Винсент Компани ҳодисани "жуда омадсиз" деб атади: "Пенальти машқи пайтида содир бўлди. Бу бизни ҳайратда қолдирди. Биз унга барча эзгу тилакларни тилаймиз. Серж бу мавсумда биз учун ажойиб иш қилди."
Йошуа Киммих дазн'га берган интервьюсида: "Аслида жамоамиздаги кайфиятнинг ташкилотчиси Серждир. У биз учун ҳам ўйинчи, ҳам инсон сифатида жуда қадрли. Мен уни қаттиқ соғиняпман. Бу катта йўқотиш. Умид қиламанки, бу бўшлиқни қандайдир тўлдира оламиз", деди.
"Бавария"нинг спорт директори Макс Эберл эса: "У хотиржам, аммо бу аччиқ ҳолат. У 30 ёшда ва қанча ўйнашини билмайман, аммо бу унинг Жаҳон чемпионатида иштирок этиш учун сўнгги имконияти бўлиши мумкин", деб изоҳ берди.
Клуб президенти Ҳерберт Ҳайнер ҳам: "Бу аччиқ ҳолат. Бугун унга қўнғироқ қилдим, лекин жавоб олмадим. Баъзан жавоб бергинг келмайди — буни тушунаман. Албатта, унинг кайфиятини кўтариш учун ҳаракат қиламиз", деди.
“Zamin”ни Telegram'да ўқинг!
