Жаҳон шахмат юлдузи, кўп карра чемпион Магнус Карлсен Жавоҳир Синдаров ва Доммаражу Гукеш ўртасидаги рақобат ҳақида ўз фикрларини билдирди. Унинг сўзлари шахмат жамоатчилигида катта муҳокама уйғотди.
Карлсенга кўра, ҳозирги ҳолатда Синдаровни очиқ-ойдин фаворит сифатида кўрмаслик қийин. Унинг фикрича, жаҳон чемпионлиги учун курашда ҳар қандай натижа мумкин, аммо энг қизиқ жиҳат — Синдаровнинг яқин келажакда қандай ўйин кўрсатиши.
Норвегиялик гроссмейстер Синдаров ва Гукеш ўртасидаги фарқни ҳам изоҳлади. Унинг таъкидлашича, Гукешда ўйинни англаш борасида баъзи аниқ камчиликлар сезилади, Синдаровда эса бу муаммо деярли кўринмайди. Шу сабаб у ўзбекистонлик шахматчини анча универсал деб баҳолади.
"Синдаров Гукешдан анча фарқ қилади. Гукешда ўйинни тушуниш борасида аниқ кўринадиган камчиликлар бор, Синдаровда эса бу унчалик сезилмайди. У анча универсал шахматчи", — деди Карлсен.
Карлсен яна бир муҳим фикрни ҳам билдирди: агар Синдаров жаҳон чемпиони бўлса ҳам, бу уни классик форматдаги жаҳон тожи учун қайта курашга қайтишга ундамайди. Унинг айтишича, у ҳозир фақат ўзи қизиққан мусобақаларда иштирок этади.
“Мен қарорларимни бошқаларнинг кутувларига қараб эмас, ўз хоҳишимга кўра қабул қиламан. Мен ўз мақсадларимга эришганман, классик жаҳон чемпионати мени энди қизиқтирмайди,” деган Карлсен.
Қисқаси, Карлсеннинг бу баёноти Синдаровга бўлган ишончни янада оширди ва уни жаҳон шахматидаги янги авлод етакчиларидан бири сифатида кўрсатди.
“Zamin”ни Telegram'да ўқинг!
