Бразилиялик ҳужумчи Винисиус Жуниор яқин келажакда "Реал Мадрид" сафида қолишга қарор қилди. Скй нашри хабарига кўра, узоқ давом этган музокаралардан сўнг томонлар янги узоқ муддатли шартнома бўйича келишувга эришган. Ҳозирда келишувнинг сўнгги тафсилотлари аниқлаштирилмоқда. Бу ҳақда Goal.com хабар беради.
Винисиуснинг амалдаги шартномаси 2027 йилда якунига етади. Футболчи бир йил аввал янги битим имзолашини айтган бўлса-да, жараён чўзилиб кетгани сабабли унинг Саудия Арабистони клубларига ўтиши ҳақида миш-мишлар тарқалган эди. Маълум бўлишича, клуб раҳбарияти ҳужумчининг юқори маош талабини қондиришни истамаган ва музокаралар бир муддат тўхтаб қолган.
Вазият янада кескинлашишига собиқ мураббий Хаби Алонсо билан юзага келган келишмовчилик сабаб бўлган. Ўтган йилги "Барселона"га қарши ўйинда захирага олинган Винисиус ўз норозилигини очиқ билдирган эди. Бироқ январь ойида Алонсонинг ўрнига Алваро Арбелоа келгач, футболчи ўзини жамоада қадрлироқ ҳис қила бошлади ва янги шартномага розилик берди.
Янги келишувга кўра, Килиан Мбаппе "Реал Мадрид"нинг энг кўп маош олувчи футболчиси бўлиб қолади. Винисиус жамоада энг кўп ҳақ оладиган ўйинчи бўлиш ниятидан қайтиб, Мбаппедан камроқ маош олишга рози бўлган. Ҳозирча кейинги мавсумда жамоани ким бошқариши номаълум, чунки Арбелоа истеъфога чиқиши кутилмоқда. Номзодлар орасида Дидье Дешам ва Себастян Хеннесс бор.
Винисиус 2018 йилда "Фламенго"дан Мадридга кўчиб ўтган эди. Ўтган вақт давомида у 370 та ўйинда майдонга тушиб, 124 та гол урди. Бразилиялик юлдуз "Реал Мадрид" билан икки марта Европа Чемпионлар лигаси ва уч марта Испания чемпионлигини қўлга киритган.
“Zamin”ни Telegram'да ўқинг!
