«Барселона» ҳужумчиси Роберт Левандовски фаолиятини Италия А Сериясида давом эттириши мумкинлиги ҳақидаги миш-мишларга жавоб қайтарди. Польшалик футболчининг каталонияликлар билан шартномаси якунига етиб бораётгани сабабли, унга «Ювентус» ва «Милан» клублари жиддий қизиқиш билдирмоқда. Ҳужумчи хайрия стрими вақтида келажаги борасидаги қарорини тез орада эълон қилишини таъкидлади. Бу ҳақда Goal.com хабар беради.
Ҳозирги вақтда 37 ёшли форвард фаолиятидаги муҳим чорраҳада турибди. У жорий мавсумда барча турнирларда 17 та гол уришга муваффақ бўлди, шундан 12 таси Испания чемпионатига тўғри келади. Шунга қарамай, «Барселона» раҳбарияти у билан 30 июндан кейинги ҳамкорлик масаласини ҳали ҳал қилмаган. «Ювентус» футболчига йилига 6 миллион евро маош таклиф қилишга тайёрлигини билдирган.
Левандовски ўзининг келажакдаги режалари ҳақида гапирар экан, Италия клубларидан бирини танлаши мумкинлигига ишора қилди. «Биласизми, биз тез орада гаплашамиз», — дея қисқа жавоб берди тажрибали ҳужумчи. Шу билан бирга, у футболчилик фаолиятини якунлаганидан сўнг мураббийлик билан шуғулланмаслигини қатъий маълум қилди. Унинг сўзларига кўра, мураббийлик иши жуда оғир ва катта босим билан боғлиқ.
Айни пайтда польшалик юлдуз бор эътиборини Испания чемпионлигини қўлга киритишга қаратган. «Барселона» турнир жадвалида «Реал Мадрид»дан 9 очко олдинда бормоқда ва мавсум якунланишига 6 та тур қолди. Агар Левандовски ёзда Италияга йўл оладиган бўлса, Ла Лига чемпионлиги унинг Испаниядаги фаолияти учун муносиб якун бўлиши кутилмоқда.
“Zamin”ни Telegram'да ўқинг! 
