Европа футболида мураббийлар атрофидаги трансферлар бозори яна қизий бошлади. Юлиан Нагельсманн ҳозирча "Челси" клубида ишлаш вариантига қизиқиш билдирмаяпти.
Маълум бўлишича, лондонликлар сўнгги муваффақиятсиз натижалардан кейин бош мураббий алмаштириш қарорини қабул қилган. "Челси" раҳбарияти "Брайтон"га қарши 0:3 ҳисобидаги мағлубиятдан кейин Лиам Росеньор билан ҳамкорликни тўхтатди ва янги мутахассис излашни бошлади.
Клуб ичидаги таҳлилларга кўра, Росеньорнинг юқори даражадаги клубларда ишлаш тажрибаси етишмагани жамоа натижаларига салбий таъсир қилган. Шу сабабдан “аристократлар” энди катта босимга дош бера оладиган, тажрибали ва нуфузли мураббийни жалб этишни мақсад қилган.
Бу талабларга мос номзодлардан бири сифатида Юлиан Нагельсманн кўрилмоқда. У 2021–2023 йилларда "Бавария"да ишлаб, юқори даражадаги клубни бошқариш тажрибасини орттирган. Бироқ The Telegraph хабарига кўра, 38 ёшли мутахассис ҳозирча бу вариантни устувор деб ҳисобламаяпти.
Шу билан бирга, Нагельсманн номи "Манчестер Юнайтед" билан ҳам боғланмоқда. Бироқ у клуб даражасидаги фаолиятини давом эттириш ёки эттирмаслик ҳақидаги қарорни шошилмасдан қабул қилмоқчи.
Қайд этилишича, агар Юлиан Нагельсманн яна клуб футболига қайтишни истаса, бу қарорни фақат ёзда бўлиб ўтадиган йирик халқаро мусобақа - Жаҳон чеипионатидан кейин қабул қилади.
Қисқача айтганда, Европа грандлари учун мураббий қидируви давом этаётган бир пайтда, Нагельсманн ўз келажагини эҳтиёткорлик билан режалаштирмоқда. Бу эса унинг кейинги қадами янада катта резонанс келтиришини англатади.
