«Ливерпуль» ҳужумчиси Александер Исак «Кристал Пэлас»га қарши баҳсда (3:1) мерсисайдликлар сафидаги илк голини киритганидан сўнг ўз спорт формасини тиклаётганини маълум қилди. Швециялик футболчи ўтган йилнинг август ойида «Нюкасл»дан 125 миллион фунт стерлинг эвазига трансфер қилинган эди. Бу ҳақда Goal.com хабар беради.
26 ёшли форварднинг Англия рекордини янгилаган трансферидан кейинги фаолияти жароҳатлар сабабли бироз қийин кечди. Декабрь ойида оёғидан олган оғир жароҳати ва ундан кейинги жарроҳлик амалиёти сабабли у узоқ вақт майдонга туша олмади.
Алексис Маc Алистер йўллаган зарбани дарвоза тўрига йўналтирган Исак ушбу гол унинг учун бурилиш нуқтаси бўлишига умид қилмоқда. Футболчи жисмоний ва руҳий қийинчиликларни енгиб ўтиб, тўлиқ спорт формасига қайтаётганини таъкидлади.
Жамоа устози Арне Слот ўйиндан олдин Исак ҳали ўзининг энг юқори даражасида эмаслигини айтган эди. Бироқ ҳужумчининг голи «Ливерпуль»га муҳим уч очкони тақдим этди ва жамоани турнир жадвалида тўртинчи ўринга олиб чиқди.
Учрашувда мерсисайдликлар дарвозасини учинчи рақамли посбон Фредди Вудмен қўриқлади. Алиссон ва Мамардашвили жароҳат олгани сабабли дебют қилган дарвозабоннинг сейвлари ҳамда Флориан Виртснинг сўнгги дақиқалардаги голи «Ливерпуль» ғалабасини мустаҳкамлади.
“Zamin”ни Telegram'да ўқинг!
