«Манчестер Сити» «Арсенал»ни мағлуб этиб, чемпионлик пойгасини қизитиб юборди

Англия Премьер лигасининг марказий баҳсида «Манчестер Сити» ўз майдонида «Арсенал» устидан 2:1 ҳисобида ғалаба қозонди. Ушбу натижа чемпионлик пойгасидаги вазиятни кескин ўзгартириб юборди ва Лондон клубининг пешқадамлик мавқейига жиддий зарба берди. Бу ҳақда Goal.com хабар беради.

Ўйиндан сўнг «Арсенал» ярим ҳимоячиси Деклан Райс жамоадошларини руҳлантиришга ҳаракат қилди. Лаб ўқувчи мутахассислар инглиз футболчиси жамоа сардори Мартин Одегаардга қараб: «Ҳаммаси ҳали тугагани йўқ», деб айтганини аниқлашди.

Гарчи «Арсенал» сўнгги олтита ўйиннинг фақат биттасида ғалаба қозонган бўлса-да, жамоа устози Микел Артета шогирдларининг иродасига ишонишини билдирди. Унинг сўзларига кўра, кийиниш хонасида футболчилар курашни давом эттиришга тайёр эканликларини муҳокама қилишган.

Ҳозирда «Арсенал» турнир жадвалида уч очколик устунликка эга, бироқ Пеп Гвардиола жамоасида битта захира ўйини мавжуд. Олдинда лондонликларни «Нюкасл» ва «Фулхэм»га қарши муҳим баҳслар кутиб турибди.

Nodirbek Razzokov

«ZAMIN.UZ» муҳаррири

+ Zamin.uz сайтини Googleга қўшинг