Европа саҳнасида яна бир драматик тўқнашув кузатилди. Пари Сен-Жермен ўз майдонида "Бавария"ни 5:4 ҳисобида мағлуб этиб, яримфиналнинг илк баҳсида устунликни қўлга киритди. Ушбу учрашувдан кейин жамоа етакчиларидан бири — Усмон Дембеле муҳим фикрлар билан ўртоқлашди.
Франциялик вингер жамоадаги интизом ва талабчанлик муҳити ҳақида гапириб, бош мураббий Луис Энрикенинг принципиал ёндашувини алоҳида таъкидлади:
— Агар сен прессинг қилмасанг ёки ҳимояда жамоага ёрдам бермасанг, Энрике сени дарҳол захирага ўтқизади, — деди Дембеле CBSга берган интервьюсида.
Ушбу сўзлар жамоадаги талаб юқори даражада эканини кўрсатади. Ҳар бир футболчи нафақат ҳужумда, балки ҳимояда ҳам максимал меҳнат қилиши шарт.
Айнан Дембеленинг ўзи мазкур баҳснинг ҳақиқий қаҳрамонига айланди. У 33-дақиқада Жоау Невешга голли узатма бериб, жамоасининг илк устунлигига ҳисса қўшди. Биринчи бўлим охирида эса ўзи ишлаб олган пеналтини аниқ амалга оширди.
Учрашувнинг иккинчи бўлимида ҳам у тўхтаб қолмади — 58-дақиқада киритган голи парижликлар учун ҳал қилувчи, ғалаба голига айланди. Шу тариқа Дембеле 2+1 натижа билан ўйин тақдирини белгилаб берди.
Натижада у учрашувнинг энг яхши футболчиси деб топилди ва жамоасининг муҳим ғалабасида ҳал қилувчи фигура бўлди.
Қисқаси, Энрикенинг қатъий талаблари ва Дембеленинг юқори формаси “ПСЖ”ни янги чўққиларга олиб чиқмоқда. Мюнхендаги жавоб баҳси эса янада қизиқ ва кескин ўтиши аниқ.
“Zamin”ни Telegram'да ўқинг!
