Аргентиналик афсонавий ҳужумчи Серхио Агуэро «Манчестер Сити»нинг жорий мавсумдаги муваффақиятларида ёш футболчилар — Нико О'Райли ва Абдуқодир Ҳусановнинг ҳиссаси катта эканини алоҳида таъкидлади. Унинг фикрича, айнан шу икки иқтидор эгаси жамоанинг ички требл учун курашида муҳим рол ўйнамоқда.
«Шаҳарликлар» тарихидаги энг яхши тўпурар ҳисобланган Агуэро О'Райлини жуда юқори баҳолаб, уни PFA талқини бўйича йилнинг энг яхши ёш футболчиси совринига асосий даъвогарлардан бири сифатида кўрмоқда. Унинг таъкидлашича, Нико бу мавсумда жуда барқарор ва ишончли ўйин намойиш этяпти.
— Ёш футболчи мукофотига номзодларни қандай танлашларини тўлиқ билмайман, аммо ҳозирги формага қарасак, О'Райли бу совринга муносиб. У жуда яхши мавсум ўтказмоқда, — деди Агуэро.
Шу билан бирга, у ўзбекистонлик ҳимоячи Абдуқодир Ҳусановнинг ўйинини ҳам алоҳида эътироф этди. Агуэронинг фикрича, Ҳусанов ҳозирнинг ўзидаёқ жамоа ҳимоя чизиғида ишончли ўйинчига айланган ва келажакда жаҳон даражасидаги ҳимоячилар сафидан жой олиши мумкин.
— Ҳусанов тезкор, жисмонан бақувват ва жуда шиддатли футболчи. Унинг ўйини менга жуда ёқади. Аммо энг муҳими — шу даражани узоқ вақт сақлаб қолиш. Агар у 3-4 йил давомида шундай ўйин кўрсатса, бемалол дунёнинг энг яхши ҳимоячиларидан бирига айланади, — дея таъкидлади аргентиналик юлдуз.
Маълумки, ҳозирда «Манчестер Сити» таркибий янгиланиш жараёнини бошдан кечирмоқда. Спорт директори Угу Виана раҳбарлигида жамоа бир қатор ўзгаришларни амалга оширмоқда. Шунга қарамай, «шаҳарликлар» сўнгги ҳафталарда барча кутилмалардан ошиб, март ойидан буён барча мусобақаларда кетма-кет олтита ғалабага эришди.
Пеп Гвардиола шогирдлари ҳозир иккинчи ички требл сари ишонч билан қадам ташламоқда. Бу йўлда О'Райли ва Ҳусанов сўнгги бир ярим ой давомида деярли ўзгармаган асосий таркибнинг ажралмас қисмига айланди.
Агуэронинг таъкидлашича, мураббий бундай муҳим паллада хато қилишга ҳақли эмас ва айнан ишончли футболчиларга суяняпти. Шу жиҳатдан, ёш футболчиларнинг жамоа таркибидаги роли янада ортиб бормоқда.
Қисқача айтганда, клуб афсонасининг бундай илиқ фикрлари О'Райли ва Ҳусанов учун катта мотивация бўлиб хизмат қилади. Чунки бу эътироф жаҳон футболида юксак обрўга эга бўлган, «Манчестер Сити» тарихида из қолдирган буюк ҳужумчи томонидан билдирилмоқда.
“Zamin”ни Telegram'да ўқинг!
