Бавария ҳужумчиси Гарри Кейн Чемпионлар лигаси финалида PSJ жамоасини фаворит деб ҳисобламоқда. Ярим финалда Луис Энрике шогирдларига имкониятни бой берган мюнхенликлар турнирни тарк этишди, аммо инглиз ҳужумчиси парижликларнинг тажрибаси финалда ҳал қилувчи омил бўлишига ишонмоқда. Бу ҳақда Goal.com хабар беради.
Аллианз Аренада кечган жавоб учрашуви 1:1 ҳисобида якунланди ва икки ўйин натижасига кўра PSJ 6:5 ҳисобида ғалаба қозонди. Гарри Кейн ўйин якунида ҳакамлик қарорларидан норозилигини яширмади ва айниқса пеналти белгиланмагани ҳамда Нуно Мендесга қизил карточка кўрсатилмаганидан шикоят қилди.
Финалда PSJ ўз тарихида кетма-кет иккинчи бор чемпионликни қўлга киритиш учун Арсенал жамоасига қарши майдонга тушади. Гарри Кейн бу икки жамоанинг ўйин услуби турлича эканлигини таъкидлаб, финал жуда қизиқарли кечишини башорат қилди.
Собиқ Тоттенхем юлдузи финални томоша қилиши ёки қилмаслиги ҳақидаги саволга ҳозирча аниқ қарорга келмаганини билдирди. У ўз жамоасининг турнирдан чиқиб кетганидан қаттиқ хафа эканлигини ва ҳозирги ҳолатда футбол ҳақида ўйлаш қийинлигини қўшимча қилди.
“Zamin”ни Telegram'да ўқинг!
