Англиянинг машҳур клубларидан бири саналган “Астон Вилла” яна Европа футболи марказига қайтмоқда. Бирмингҳэм жамоаси орадан 44 йил ўтиб, илк бор еврокубок финалига чиқишга муваффақ бўлди.
Унаи Эмери бошчилигидаги жамоа Европа Лигаси яримфиналида “Ноттингҳэм Форест”ни икки учрашув натижасига кўра ишончли тарзда мағлуб этди. Биринчи баҳсда 0:1 ҳисобида имкониятни бой берган “Астон Вилла” жавоб учрашувида рақибини 4:0 ҳисобида тор-мор этди ва финал йўлланмасини қўлга киритди.
Энди инглиз клуби ҳал қилувчи баҳсда Германиянинг “Фрайбург” жамоасига қарши майдонга тушади.
Футбол мухлислари учун энг қизиқ жиҳатлардан бири шундаки, “Астон Вилла” сўнгги марта 1982 йилда еврокубок финалида иштирок этган эди. Ўша йили клуб Европа чемпионлар кубоги финалида Германиянинг “Бавария” жамоасини 1:0 ҳисобида мағлуб этиб, ўз тарихидаги энг катта совринлардан бирига эга чиққан.
Бу ғалаба ҳалигача клуб тарихидаги энг ёрқин саҳифалардан бири сифатида эсга олинади.
Шунингдек, бирмингҳэмликлар 2001 ва 2008 йилларда Интертото кубогида ҳам зафар қучган. Аммо кейинги йилларда жамоа Европа саҳнасидан бироз узоқлашиб қолган эди.
Ҳозир эса Унаи Эмери “Астон Вилла”ни яна катта майдонга олиб чиқишни уддалади. Испаниялик мутахассиснинг тажрибаси ва тактик қарашлари жамоага янги нафас бағишлагани таъкидланмоқда.
Финалдаги рақиб — “Фрайбург” учун эса бу умуман тарихий натижа ҳисобланади. Немис клуби ўз тарихида биринчи марта еврокубок финалига чиқди.
Бунга қадар “Фрайбург”нинг Европа мусобақаларидаги энг яхши натижаси Европа Лигаси 1/8 финали бўлиб келган. Жамоа бу босқичга 2022/23 ва 2023/24 йилги мавсумларда чиққан эди.
Мутахассислар фикрича, финалда тажриба ва тарих “Астон Вилла” томонида бўлса, “Фрайбург” ёшлик шижоати ва интилиши билан хавфли рақиб бўлиб турибди.
Европа Лигасининг ҳал қилувчи финал баҳси 20 май куни Туркиянинг Истанбул шаҳрида бўлиб ўтади. Мухлислар эса аллақачон ушбу учрашувни катта қизиқиш билан кутишмоқда.
“Zamin”ни Telegram'да ўқинг!
