Бавария фахрий президенти Ули Хёнес 2009-йилги Чемпионлар лигаси чорак финалида Барселонага қарши кечган ўйинни ҳамон оғриқ билан эслайди. ФАЗ нашрига берган интервюсида 74 ёшли функционер сўнгги 25 йил ичида бирор ўйинни интиқлик билан кутмаганми деган саволга жавоб берар экан, айнан каталонияликларга қарши жавоб учрашувини истисно сифатида келтирди. Бу ҳақда Goal.com хабар беради.
Камп Ноу стадионида ўтган дастлабки баҳсда Пеп Гвардиола шогирдлари Баварияни шарманда қилганди. Учрашувнинг биринчи бўлимидаёқ Лионел Месси (дубл), Самуел Этўо ва Тьерри Анри ҳисобни 4:0 кўринишига келтиришди. Ўша вақтда захира ўриндиғида Юрген Клинсманн ёнида ўтирган Хёнес ўйиннинг тугашини соатига қараб интизорлик билан кутганини тан олди.
Ули Хёнеснинг сўзларига кўра, ўша оқшом Барселона футболчилари Баварияга нисбатан раҳм-шафқат кўрсатишган. Унинг фикрича, каталонияликлар танаффусда ўзаро келишиб, иккинчи бўлимда бироз сустроқ ҳаракат қилишга қарор қилишган. Бу мағлубият Бавария учун ўша даврдаги энг оғир зарба бўлиб қолди.
Мюнхендаги жавоб учрашуви 1:1 ҳисобидаги дуранг билан якунланган бўлса-да, бу натижа Баварияни мавсумдаги муваффақиятсизликлардан қутқариб қола олмади. Натижада Юрген Клинсманн истеъфога чиқарилиб, унинг ўрнини вақтинча Юпп Хайнкес эгаллади, кейинчалик эса жамоани Луи ван Гал бошқарди.
“Zamin”ни Telegram'да ўқинг!
