Килиан Мбаппенинг орзусидаги Реал Мадрид клубига ўтиши кутилганидек силлиқ кечмаяпти. Франциялик ҳужумчининг Испания пойтахтидаги келажаги борасида турли миш-мишлар тарқалмоқда. Молия экспертларининг фикрича, футболчини сотиб олиш учун жуда катта маблағ талаб этилади ва бу битимни амалга оширишга дунёдаги саноқли клубларгина қодир. Бу ҳақда Goal.com хабар беради.
Молия бўйича эксперт доктор Роб Вилсоннинг таъкидлашича, Реал Мадрид Мбаппени қўйиб юбориши учун клуб ва футболчи ўртасидаги муносабатлар кескин ёмонлашиши керак. Гарчи у Мадридга эркин агент сифатида келган бўлса-да, шартнома шартлари, имзо бонуси ва имидж ҳуқуқларини ҳисобга олганда, клуб унга 300 миллион еврога яқин маблағ сарфлаган.
Вилсоннинг сўзларига кўра, Флорентино Перез футболчини сотиш учун Пари Сен-Жерменнинг Неймар учун тўлаган 222 миллион евролик рекордидан ҳам юқорироқ нарх талаб қилиши мумкин. Маошлар ва бошқа харажатларни қўшганда, умумий трансфер пакети 350-400 миллион евродан ошиб кетади. Бу эса уни сотиб олишга қодир ягона манзил сифатида Саудия Арабистонини кўрсатмоқда.
Мбаппени бошқа юлдузлардан ажратиб турадиган жиҳат унинг тижорий салоҳиятидир. Лионел Месси ва Криштиано Роналдо каби франциялик футболчи ҳам глобал бренд ҳисобланади. Унинг Нике ва EA Sports каби йирик ҳомийлар билан ҳамкорлиги ҳамда ёш мухлислар орасидаги оммабоплиги уни шунчаки ҳужумчи эмас, балки катта бизнес лойиҳасига айлантиради.
“Zamin”ни Telegram'да ўқинг!
