Мбаппе Роналду рекордини янгилаш арафасида турибди

Килиан Мбаппе жорий мавсумда ниҳоятда юқори самарадорлик кўрсатмоқда. У Ла Лигадаги 17 ўйинда 17 гол урди, Чемпионлар лигасидаги беш учрашувда эса 9 бор рақиб дарвозасини ишғол қилди.

Аввалги мавсумнинг якуний қисми ҳам инобатга олинса, франсиялик ҳужумчи "Реал" сафида сўнгги бир йил ичида жами 56 голга етди. Янги йилга бир ҳафтадан сал кўпроқ вақт қолган бўлса-да, Мбаппеда мадридликлар таркибида бир календар йил ичида урилган голлар бўйича Криштиану Роналду рекордини янгилаш имконияти бор.

Роналду "Реал"даги фаолияти давомида жамоанинг асосий зарба кучи бўлган. У деярли ҳар йили 50 тадан ортиқ гол урган, энг яхши натижасини эса 2013 йилда қайд этиб, 50 ўйинда 59 гол киритган.

Умуман олганда, ўша календар йилда португалиялик футболчи жами 69 марта гол муаллифига айланган. XXI асрда календар йил бўйича энг кўп гол урган футболчилар рўйхатида Роналду икки марта учрайдиган ягона ўйинчи ҳисобланади.

У 2012 йилда 63 гол урган, шундан 58 тасини "Реал" сафида киритиб, худди шунча ўйинда майдонга тушган. Роналду фаолиятининг катта қисмида ҳар ўйинга деярли биттадан гол ўртача кўрсаткичини ушлаб турди ва айнан шу барқарорлик уни 1000 гол маррасига даъвогарлардан бирига айлантирди.

XXI асрда 70 гол чегарасидан ошган ягона футболчи Лионел Месси бўлиб қолмоқда. Аргентиналик 2012 йилда мислсиз натижа қайд этиб, бир йил ичида 91 гол урган.

Месси "Барселона" сафида 60 ўйинда 79 марта, терма жамоа сафида эса 9 учрашувда 12 бор гол урди. Бу кўрсаткич футбол тарихидаги энг юқори натижа саналади.

Ҳаттоки ҳужумкор футбол даврида Пеле ҳам йилига 75 ва 72 тадан гол ургани қайд этилган (мос равишда 1958 ва 1965 йиллар). Мессидан олдин эса календар йил рекорди Герд Мюллерга тегишли бўлиб, у 1972 йилда 85 гол урган.

Манбада келтирилишича, Мбаппе 2025 йилда барча мусобақалар бўйича 63 гол уриб, тарихда календар йилнинг энг яхши тўпурарларидан иборат кучли ўнликка кирган ҳамда XXI аср бўйича ушбу кўрсаткичда бешинчи ўринга кўтарилган. Шунингдек, у Роналду 2015 йилда "Реал" сафида урган 54 гол кўрсаткичидан ҳам ошиб кетган.

Мбаппени жорий календар йилда "Реал" сафида яна битта сўнгги ўйин кутмоқда. Агар у бу учрашувда тўртта гол урса, клубнинг бир йил ичидаги голлар рекорди янгиланади.

Ҳозирча бу йўналишда "Реал" рекордчиси Роналду бўлиб, унинг 2013 йилдаги натижаси 59 голни ташкил этади. "Севилья"га қарши ўйиндаги покер Мбаппенинг "қаймоқранглилар" тарихида алоҳида ўрин эгаллашига хизмат қилиши мумкин.

XXI асрда календар йил бўйича энг кўп гол урган футболчилар: Лионел Месси — 91 (2012) Криштиану Роналду — 69 (2013) Роберт Левандовски — 69 (2021) Криштиану Роналду — 63 (2012) Килиан Мбаппе — 63 (2025) “Zamin”ни Telegram'да ўқинг!