Мавсум якунига яқинлашар экан, Бавария сардори Мануэль Нойер яна диққат марказида. 40 ёшли дарвозабон фаолиятини яна бир йилга узайтириш бўйича клуб раҳбарияти билан келишувга эришгани хабар қилинмоқда. Фабризио Романо ва Скй нашрларининг маълумотларига кўра, томонлар шартнома шартларини келишиб олган ва яқин кунларда расмий имзолаш маросими бўлиб ўтади. Бу ҳақда Goal.com хабар беради.
Нойер ушбу шартнома доирасида йиллик маошини қисқартиришга рози бўлган. Клуб фахрий президенти Ули Хёнес ҳам тажрибали посбоннинг жамоада қолишини қўллаб-қувватлаб, унинг Бавария учун ҳали ҳам муҳим эканлигини таъкидлади. Жамоанинг иккинчи дарвозабони Жонас Урбиг эса Нойер қўл остида ўз маҳоратини оширишда давом этади.
Нойернинг ажойиб ўйинлари мухлисларда унинг Германия терма жамоасига қайтиши мумкинлиги ҳақидаги умидларни уйғотди. Бироқ, дарвозабон терма жамоадаги фаолиятини якунлаганини ва диққатини фақат Баварияга қаратганини бир неча бор таъкидлади. У Чемпионлар лигаси доирасидаги Реал Мадридга қарши баҳсдан сўнг ҳам бу мавзуга қайтмаслигини билдирган эди.
Германия терма жамоаси бош мураббийи Жулиан Нагелсманн ҳам Нойернинг қарорини ҳурмат қилишини ва терма жамоа таркиби бўйича бошқа режалар билан ишлаётганини қайд этди. Шундай қилиб, афсонавий дарвозабон ўз фаолиятининг сўнгги йилларини Мюнхен клубида ўтказишга қарор қилди.
“Zamin”ни Telegram'да ўқинг!
