ESPN нашри АҚШ, Канада ва Мексикада бўлиб ўтадиган 2026 йилги футбол бўйича Жаҳон чемпионати бошланишига бир ой қолганида миллий терма жамоаларнинг куч рейтингини тақдим этди. Ушбу рўйхатдан дунёнинг энг кучли деб баҳоланаётган 15 та терма жамоаси ўрин олди.
Рейтингда биринчи ўрин Испания терма жамоасига берилди. Европанинг кучли ва техник футбол намойиш этадиган ушбу жамоаси мундиал олдидан асосий фаворитлардан бири сифатида кўрилмоқда. Иккинчи поғонадан Франция жой олган бўлса, амалдаги жаҳон чемпиони Аргентина кучли учликни якунлаган.
ESPN талқинига кўра, Англия тўртинчи, Бразилия бешинчи, Португалия эса олтинчи ўринда қайд этилган. Бу жамоаларнинг ҳар бири таркиб жиҳатидан жуда кучли ва Жаҳон чемпионатида юқори натижа учун курашиш имкониятига эга.
Рейтингнинг кейинги ўринларидан Германия, Нидерландия, Марокаш, Норвегия, Белгия, Колумбия, Сенегал, Хорватия ва Япония терма жамоалари жой олди. Эътиборлиси, Осиё вакили Япония ҳам кучли 15 таликка киритилган.
ESPN миллий терма жамоалар рейтинги:
Испания
Франция
Аргентина
Англия
Бразилия
Португалия
Германия
Нидерландия
Марокаш
Норвегия
Белгия
Колумбия
Сенегал
Хорватия
Япония
Эслатиб ўтамиз, Аргентина терма жамоаси амалдаги жаҳон чемпиони ҳисобланади. 2022 йил Қатарда ўтган мундиал финалида аргентиналиклар Францияни асосий ва қўшимча вақтдаги 3:3 ҳисобидан кейин пенальтилар сериясида 4:2 ҳисобида мағлуб этган эди.
2026 йилги Жаҳон чемпионати 11 июнь куни старт олади ва 19 июлгача давом этади. Турнир илк бор уч мамлакат — АҚШ, Канада ва Мексика мезбонлигида ўтказилади.
Қисқаси, ESPN мундиал олдидан кучлар нисбатини белгилаб берди. Испания биринчи ўринда, Франция ва Аргентина уни таъқиб қилмоқда. Аммо Жаҳон чемпионатида рейтинг бошқа, майдон бошқа. Катта турнирларда баъзан фаворитлар эмас, энг тайёр ва энг совуққон жамоалар тарих ёзади.
“Zamin”ни Telegram'да ўқинг!
