"Тоттенхем" ҳимоячиси Кристиан Ромеро клубнинг қуйи лигага тушиб кетиш хавфи остида турган бир пайтда Аргентинага йўл олгани учун қаттиқ танқидга учради. Гленн Ҳоддле ва Теддй Шерингҳам каби клуб афсоналари футболчининг садоқати ва етакчилик қобилиятини шубҳа остига олишди. Шунга қарамай, аргентиналик марказий ҳимоячи якшанба куни "Эвертон"га қарши бўлиб ўтадиган ҳал қилувчи баҳс олдидан Англияга қайтиб келди. Бу ҳақда Goal.com хабар беради.
Ромеро тиззасидан олган жароҳатини даволаш учун ватанига кетган эди, бироқ унинг собиқ жамоаси "Белграно" иштирокидаги ўйинни томоша қилиш учун стадионга боргани Лондон клуби атрофида катта норозилик уйғотди. Клуб Англия Премер-лигасида қолиш учун курашаётган бир пайтда, жамоа сардорининг бундай ҳаракати кўплаб саволларни келтириб чиқарди. Шунингдек, унинг ёзда Испания чемпионатига кўчиб ўтиши ҳақидаги хабарлар ҳам вазиятни кескинлаштирди.
Собиқ мураббий Гленн Ҳоддле футболчининг хатти-ҳаракатини кескин қоралади: "Мен уни аэропортгача кузатиб қўйган ва ортингга қайтма деган бўлардим. Бу унинг худбинлигидан далолат. Бундай ҳаракат қиладиган одам сардор бўла олмайди. Агар у оилавий сабаблар билан кетганида тушуниш мумкин эди, лекин шунчаки футбол кўриш учун кетган бўлса, уни Аргентинада қолдириб, иложи борича кўпроқ пулга сотиб юбориш керак".
Теддй Шерингҳам ҳам бу фикрларга қўшилиб, сардор ўз жамоадошлари билан бирга бўлиши шартлигини таъкидлади. "Клуб тарихидаги энг муҳим ўйин олдидан сардорнинг йўқлиги ёмон ўрнак бўлади. У ҳатто кетиш ҳақида сўрашга ҳам ҳақли эмас эди. У кийиниш хонасида жамоадошларини қўллаб-қувватлаб туриши керак эди", — деди Шерингҳам.
Ҳозирда Ромеро "Сандерленд"га қарши ўйинда олган жароҳати сабабли майдонга туша олмайди, бироқ клуб раҳбарияти унинг жамоа билан бирга бўлиши руҳий ҳолатни яхшилашига умид қилмоқда. Бош мураббий Роберто Де Зерби эса ҳимоячининг келажаги ҳақидаги миш-мишларга изоҳ беришдан бош тортди.
“Zamin”ни Telegram'да ўқинг!
