Реал Мадрид юлдузи Винисиус Жуниор Барселона ҳужумчиси Ламине Ямал ҳақида юқори фикр билдириб, ёш иқтидор эгасининг имкониятларини алоҳида эътироф этди. Бразилиялик футболчи икки клуб ўртасидаги ашаддий рақобатга қарамай, испаниялик вингернинг фавқулодда истеъдодга эга эканлигини ва у нуфузли халқаро турнирда якка ўзи ғалаба қозонишга қодир эканини таъкидлади. Бу ҳақда Goal.com хабар беради.
Казе ТВ телеканалига берган интервюсида Винисиус Жуниор клублараро рақобатни четга суриб, Ямал ҳақида шундай деди: "Испания таркибида дунёнинг энг яхши ўйинчиларидан бири Ламине Ямал бор. У майдонда ақлбовар қилмас ишларни амалга оширади. У Жаҳон чемпионатида бир ўзи ғалаба қозониши мумкин бўлган футболчилар сирасига киради. Унинг ўйинини томоша қилиш учун пул тўласа арзийди".
2025-йилги Олтин тўп рейтингида иккинчи ўринни эгаллаган Ямал Барселона сафида ўзининг юксак маҳоратини намойиш этиб келмоқда. Ўсмир ёшдаги иқтидор эгаси жорий мавсумда барча мусобақаларда 45 та ўйинда майдонга тушиб, 24 та гол ва 18 та ассист қайд этди. Испания терма жамоаси сафида эса у аллақачон Европа чемпионлигини қўлга киритган ва жамоанинг асосий етакчисига айланган.
Шу билан бирга, Винисиус Жуниор ҳам ўз мамлакати Бразилия терма жамоасининг асосий ҳужумкор кучи бўлиб қолмоқда. Реал Мадрид сафида икки бор Чемпионлар лигаси ғолиби бўлган вингер ушбу мавсумда 53 та ўйинда 22 та гол уришга муваффақ бўлди. Ҳар икки юлдуз ҳам айни дамда бўлажак Жаҳон чемпионатига жиддий тайёргарлик кўрмоқда.
Испания терма жамоаси ЖЧ гуруҳ босқичида Кабо-Верде, Саудия Арабистони ва Уругвайга қарши баҳс олиб борса, Бразилия Марокаш, Гаити ва Шотландия билан куч синашади. Ҳар икки футболчи ҳам ўз миллий жамоалари билан турнирда узоқроққа боришни мақсад қилган.
“Zamin”ни Telegram'да ўқинг!
