Пари Сен-Жермен жамоаси Арсенал устидан қозонилган ғалабадан сўнг Европа тахтини ўзида сақлаб қолди ва футбол тарихидаги энг буюк клублар қаторидан жой олди. Франция гиганти спорт тарихида камдан-кам кузатиладиган натижага эришиб, ярим асрдан бери ўзгармасдан келаётган рекордни янгилади. Бу ҳақда Goal.com хабар беради.
PSJ кетма-кет икки мавсум давомида ҳам ўз ички чемпионати, ҳам Чемпионлар лигаси ғолиблигини қўлга киритган тарихдаги учинчи жамоага айланди. Бундай натижа бунгача фақат 1950-йиллардаги Реал Мадрид (1956-58) ҳамда 1970-йиллар бошидаги Аякс (1971-73) клубларига насиб этган эди. Луис Энрике шогирдлари Будапештдаги драматик баҳсда ўз иродасини намойиш этди.
Финал учрашуви ўта кескин курашлар остида ўтиб, ғолиб номи пеналтилар сериясида аниқланди. Кай Хаверц томонидан киритилган эрта голга Усман Дембеле жавоб қайтарди ва асосий вақт дуранг билан якунланди. Пеналтилар сериясида Габриел Магалҳаеснинг хатоси парижликларга 4:3 ҳисобидаги ғалабани тақдим этди.
Учрашув давомида PSJ тўп назоратини ўз қўлида ушлади, Арсенал эса ҳимоявий ўйин кўрсатди. Опта маълумотларига кўра, Лондон клуби 24,7% тўп назоратига эга бўлди — бу 2004-йилдан буён Чемпионлар лигаси финаллари тарихидаги энг паст кўрсаткичдир. Ушбу ғалаба Луис Энрике учун ҳам муҳим босқич бўлди.
Испаниялик мутахассис уч ва ундан ортиқ Европа кубогини қўлга киритган тўртинчи мураббийга айланди. У эндиликда Карло Анселотти, Боб Паислей, Зинедине Зидане ва Пеп Гуардиола каби афсоналар билан бир қаторда турибди. Энрике ўйиндан сўнг ушбу муваффақият бутун мавсум давомидаги меҳнатлар маҳсули эканини таъкидлаб ўтди.
“Zamin”ни Telegram'да ўқинг!
