“Ролан Гаррос-2026” мусобақасининг учинчи даврасида катта сенсация қайд этилди. Дунёнинг 30-ракеткаси Анастасия Потапова амалдаги чемпион, жаҳон рейтингида 4-ўринда бораётган америкалик Кори Гауффни мағлубиятга учратди.
Учрашув жуда кескин ва муросасиз руҳда кечди. 2 соат 39 дақиқа давом этган баҳсда Гауфф биринчи сетни 6:4 ҳисобида ўз фойдасига ҳал қилди. Бироқ Анастасия Потапова таслим бўлмади ва иккинчи сетда тай-брейкда 7:1 ҳисобида устун келиб, ўйин тақдирини ҳал қилувчи учинчи сетга олиб ўтди.
Сўнгги сетда ҳам кураш юқори даражада кечди. Аммо муҳим паллаларда дунёнинг 30-ракеткаси совуққонроқ ҳаракат қилди ва 6:4 ҳисобида ғалаба қозонди. Шу тариқа, у 4:6, 7:6, 6:4 ҳисобида амалдаги чемпионни мусобақадан чиқариб юборди.
Бу натижа турнирнинг энг кутилмаган воқеаларидан бири бўлди. Чунки Кори Гауфф нафақат амалдаги ғолиба, балки бу йилги “Ролан Гаррос”нинг ҳам асосий фаворитларидан бири сифатида баҳоланаётган эди. Кўпчилик уни дунёнинг биринчи ракеткаси Арина Соболенко билан бош соврин учун асосий рақобатчи деб кўраётганди.
Бундай тахминларга асос ҳам бор эди. Ўтган йили айнан “Ролан Гаррос” финалида Гауфф Соболенкони қизиқарли ва кескин баҳсда мағлуб этиб, чемпионликни қўлга киритганди. Аммо бу сафар Париж кортларида америкалик теннисчи ўз унвонини ҳимоя қилишни эрта якунлашга мажбур бўлди.
Кейинги даврада ғолиб теннисчи россиялик Анна Калинскаяга қарши кортга чиқади. Калинская айни пайтда дунёнинг 24-ракеткаси ҳисобланади ва навбатдаги баҳс ҳам осон кечмаслиги аниқ.
Қисқаси, “Ролан Гаррос”да катта сенсация рўй берди: Кори Гауфф учинчи даврадаёқ мусобақани тарк этди. Амалдаги чемпион учун бу оғир зарба, рақиби Анастасия Потапова учун эса катта имконият. Париж кортлари яна бир бор исботлади — теннисда фаворит дегани ҳали ғалаба кафолати эмас.
“Zamin”ни Telegram'да ўқинг!
