Милан жамоасининг юлдузли ҳужумчиси Рафаел Леао Италиядаги фаолиятини якунлаб, бошқа чемпионатда ўзини синаб кўрмоқчи эканлигини очиқчасига маълум қилди. Сан Сирода этти мавсум давомида тўп сурган португалиялик вингер, жамоасининг Чемпионлар лигаси йўлланмасидан маҳрум бўлгани ва омадсиз мавсумдан сўнг клубни тарк этишга тайёрлигини билдирди. Бу ҳақда Goal.com хабар беради.
Sport ТВ телеканалига берган интервюсида 26 ёшли футболчи ўз амбициялари ҳақида гапирди: “Шахсан ўзим Милан учун боримни бериб бўлдим деб ўйлайман. Бу клуб менга ўсишда ёрдам берди, қийин дамларда қўллаб-қувватлади ва мен ўз исмимни Россонери тарихига ёзиб қўйишга муваффақ бўлдим. Аммо ҳар бир инсоннинг ўз орзулари ва янги чақирувлари бўлади. Мен бошқа лигада янги қийинчиликларга дуч келишни истайман”, — деди Рафаел Леао.
Ушбу баёнот Англия Премер-лигаси грандлари, хусусан, Манчестер Юнайтед эътиборини тортиши аниқ. Аввалроқ Леао ўзининг кумири Криштиано Роналдо бўлгани сабабли Манчестер Юнайтед ўйинларини кузатиб боришини ва бу жамоага нисбатан илиқ муносабатда эканини айтиб ўтган эди. Шунингдек, у Арсенал жамоасининг ўйин услубини ҳам ёқтиришини яширмаган.
Ҳозирда Милан клубида жиддий ўзгаришлар даври кетмоқда. Жамоа А Серияда бешинчи ўринни эгаллади ва раҳбариятда бўшлиқ юзага келган. Массимилиано Аллегри кетганидан сўнг клуб янги мураббий қидирмоқда ва номзодлар орасида Оливер Гласнер номи тилга олинмоқда. Молиявий мувозанатни сақлаш ва таркибни янгилаш учун клуб эгалари ўз юлдузини сотишга мажбур бўлишлари мумкин.
Рафаел Леао аввалроқ Златан Ибрагимович қўл остида ўзини кўрсатишни хоҳлаган бўлса-да, Чемпионлар лигасининг йўқлиги ва клубдаги беқарорлик уни трансфер ҳақида ўйлашга мажбур қилмоқда. Португалиялик иқтидор эгаси Европанинг энг юқори савиясида ўйнашни истамоқда, Милан эса ҳозирча буни кафолатлай олмайди.
“Zamin”ни Telegram'да ўқинг!
