Ламине Ямал Лионель Месси билан ЖЧ-2026 финалидан кейинги суҳбат тафсилотларини очиқлади

Футбол оламининг энг ёрқин ёш юлдузларидан бири Ламине Ямал 2026-йилги Жаҳон чемпионати финалидан сўнг афсонавий Лионель Месси билан бўлиб ўтган ҳиссиётларга бой мулоқот ҳақида сўзлаб берди. Испания терма жамоасининг Аргентина устидан қозонилган ғалабасидан сўнг, икки авлод вакиллари ўртасидаги ушбу учрашув рамзий маънога эга бўлди. Бу ҳақда Goal.com хабар беради.

Нью-Йоркда бўлиб ўтган драматик финал баҳсидан сўнг, Барселона клубининг собиқ ва амалдаги қаҳрамонлари майдон марказида узоқ суҳбатлашишган эди. Ямалнинг сўзларига кўра, саккиз карра "Олтин тўп" соҳибининг айтган гаплари у учун жаҳон чемпионлиги олтин медалидан кам бўлмаган қадрга эга.

Келажак авлодга билдирилган ишонч

Goal.com нашри хабарига кўра, Лионель Месси ёш ҳужумчига ўз йўлида давом этиши кераклигини ва футбол келажаги айнан янги авлод қўлида эканлигини таъкидлаган. "У менга ўз йўлимда давом этишимни ва келажак бизнинг авлодимизга тегишли эканини айтди. Бу сўзлар бўйнимдаги олтин медал каби мен учун жуда қадрли", — дея таъкидлади Ламине Ямал.

Мағлубиятга учраганига қарамай, 39 ёшли Лионель Месси турнир давомида ўзининг юқори савияда эканлигини яна бир бор исботлади. У мусобақа давомида 8 та гол ва 4 та голли узатмани амалга ошириб, Аргентина терма жамоасининг финалга қадар етиб келишида асосий ролни ўйнади. Бироқ финалда Испаниянинг ёш ва шиддатли таркиби устунлик қилди.

Устоз ва шогирд эҳтироми

Ламине Ямал болалигидан Лионель Мессига ҳавас қилиб улғайганини ва у билан энг нуфузли турнир финалида тўқнаш келиш унинг ушалган орзуси эканини яширмади. "У мен доим ҳайрат билан кузатган инсон. Ўйин якунлангач, унга бўлган чексиз ҳурматимни ижор қилдим", — дейди Испания терма жамоаси аъзоси.

Эътиборлиси шундаки, Лионель Месси ҳали финал учрашуви бошланмасиданоқ Ямал ҳақида илиқ фикрлар билдирган эди. Аргентина сардори 19 ёшли вингернинг иқтидорини юқори баҳолаб, уни "жаҳон миқёсидаги юлдуз" деб атаган ва унинг олдида буюк карьера кутаётганини башорат қилган эди.

Ушбу учрашув футбол жамоатчилиги томонидан рамзий маънода "эстафета тайёғини топшириш" деб баҳоланмоқда. Лионель Месси ўзининг сўнгги йирик турнирларидан бирини ўтказаётган бир пайтда, Ламине Ямал Барселона ва Испания футболининг янги даври етакчиси сифатида намоён бўлмоқда.