Одил Аҳмедов: "Кейруш ва Липпи даражасидаги мураббий керак"

Ўзбекистон миллий жамоаси сардори Одил Аҳмедов тарих саҳифаларидан жой олиб улгурган 2017 йилнинг сўнгги кунлари Хитойга жўнаб кетди. Аслида «Шанхай СИПГ» футболчиларига 4 январгача таътил берилганди. Лекин Андре Виллаш-Боаш бош мураббий ваколатини топширгач, клуб режалари бироз ўзгарди.

Вақтида «Мюнхен-1860», «Порту», «Фенербахче» ва «Олимпиакос» каби клубларда ишлаган Витор Перейра шанхайликлар бошқарувини қўлга олгач, табиий равишда тайёргарлик режаларини қайта кўриб чиқди. Хуллас, «СИПГ» муддатидан чамаси 10 кун аввал янги мавсум тадоригига киришди.

- Одил, таътил қандай ўтди? Олдиндан мўлжалланган барча ишларга улгурдингизми?
- Яхши дам олдим, барчасига улгурдим, ҳисоб. Фақат бир жиҳат кўнгилни бироз хира қилди - Янги йил байрамини Ватанда ўтказишни хоҳлагандим. Лекин янги бош мураббий қарори натижасида бу режам амалга ошмади. Аслида клуб ихтиёрига 4 январь куни етиб боришимиз белгиланган эди. Яъни янги мавсумга қаратилган тайёргарлик ишларини 4-санада бошлашимиз айтилганди. Тўғри, таътил қисқартирилган бўлсада, ўйлаб қўйган бир қатор ишларга вақт топдим.

Масалан, ўзим таҳсил олган футбол мактаб-интернатида бўлиб, ёш футболчиларга мўлжалланган янги майдон очилишида иштирок этдим. Қолаверса, Наманган шаҳридаги 12-умумтаълим мактабида ўқувчилар билан учрашдим. Бундан ташқари, Наманган, Тўрақўрғон ва Тошкентда фаолият юритаётган Odil Junior болалар клуби тарбияланувчилари ҳузурида бўлдим. Бу клубни яхши ниятда ташкил қилганмиз. Мана, қисқа фурсат ичида катта ишларни амалга оширдик. Хусусан, Италиянинг «Карпи» клуби билан ҳамкорликни йўлга қўйдик. Яқинда жамоамиз Италияда бўлиб қайтди. 2018 йили ҳамкорлик ишларини янада кенгайтирамиз.

- «Шанхай СИПГ»да қандай ўзгаришлар бор?
- Бош мураббий алмашгач, Карвалью клубдан кетди. Таркибда яна ўзгаришлар бўлиши тайин. Жамоа олдига қўйилажак вазифалар ҳам жиддийлашади, албатта. Билишимча, биздан камида Осиё Чемпионлар Лигаси финалига чиқиш талаб этилади. Аввалги мавсум бу борада озгина омад етишмади. Жамоамиз янгитдан шаклланаётганини ҳам эсдан чиқармаслик керак. Ҳар ҳолда, асосий рақибимиз ҳисобланган «Гуанжоу» етарли тажрибага эга ва унга айни шу ҳолат қўл келди, менимча.

- Миллий футболимизда ҳам катта ислоҳотлар бошланди. Янгиликларга муносабатингиз...
- Фақат ижобий. Чунки терма жамоа кучини айнан ички чемпионат белгилаб беради. Афсуски, шу пайтгача олий лигамиз мақтайдиган, терма жамоани кучайтирадиган даражада эмасди. Тўғри, бош жамоага олий лига клубларидан футболчилар қўшилишяпти, лекин ўйинни яққол кучайтирадиган бирор йигит чиққани йўқ. Сифат жуда паст. 25 ёшда олий лигадан кетгандим. Охирги вақтларда элит лигада ўткинчи ўйинлар миқдори шиддатли учрашувлар сонидан кўп бўлгани ҳаммага аён. Умуман, ЎФФ бошлаган ислоҳотлар натижасида футболимиз янги босқичга кўтарилса, ажабмас. Ҳар ҳолда, 12 та жамоа иштирокидаги чемпионат анча муросасиз ва шиддатли ўтишига шубҳа йўқ. Ҳа, яна жаҳон чемпионати ортида қолганимиз афсусланарли ҳолат. Аммо ҳаёт курашлардан иборат. Демак, хато ва камчиликлардан тўғри хулоса чиқариб, фақат олға интилиш керак. Олдимизда турган энг муҳим мусобақа - Осиё кубоги-2019. Энди қитъа чемпионатида совриндорлар қаторига киришимиз шарт.

Билишимча, Суперлиганинг иккинчи босқичида 6та кучли клуб чемпионлик масаласини ҳал қилади, қолган 6таси элитада қолиш учун курашади. Менимча, ҳақиқий шиддат шу босқичда кузатилади. Шахсий фикримча, энди легионерлар масаласига ҳам жиддий ёндашиш керак. Зеро, чемпионатимизда ўйнаган барча легионерлар ҳақида ижобий фикр билдириш мушкул. Мисол учун, мен ўйнаган даврда олий лигада бир қатор кучли легионерлар тўп суришарди. Дейлик, «Пахтакор»да Боян Миладинович бор эди. Агар унга жароҳати халал бермаганида, бемалол Европанинг кўзга кўринган клубида ўйнаб кетарди.

«Бунёдкор»нинг ўша пайтдаги легионерлари ҳақида ҳам шундай фикр билдириш мумкин. Ҳозирчи? Афсуски, бундай ижрочилар йўқ. Чунки клубларда хориждан футболчи таклиф этишда кўр-кўрона иш олиб бориляпти. Катта маблағ ҳавога совурилмаяптими? Ўртамиёна футболчига кетадиган пул ёш иқтидорларни ўстиришга сарфланса, фойдаси кўпроқ бўлади, менимча. Ёки хорижлик кучли селекционерлар билан ҳамкорликда ишлаш лозим. Чунончи, маҳаллий йигитларнинг янги даражага чиқишлари учун савияли легионерлар керак.

- Бугунги кунда миллий жамоа бош мураббийи масаласи диққат марказида турибди. Бу борада нима дея оласиз?
- Яқинда ЎФФ президенти Умид Аҳмаджонов билан учрашдим, турли мавзуларда суҳбатлашдик. Табиийки, миллий жамоага бош мураббий тайинлаш мавзусида ҳам фикр алмашдик. ЎФФ раҳбари Осиё футболини яқиндан биладиган, жаҳон чемпионатида ишлаш тажрибага эга таниқли мураббий олиб келиш ҳаракатида. Айтишича, ҳозир музокаралар давом этяпти. Тез орада янгилик эшитсак, ажабмас. Мана, Марокаш ва Эрон термаларига қарши ўртоқлик учрашуви ўтказиш бўйича келишувга эришилди. Менимча, шу ўйинлар муддатига қадар янги мураббий билан танишсак керак. Ҳар қандай ҳолатда ҳам, кучли мутахассис тайинланиши тарафдоримиз.

Битта ёрқин мисол: италиялик Марчело Липпи Хитой термасини қисқа фурсатда кескин кучайтирди. Буни ҳамма кўрди. Тўғри, хитойликлар биз каби мундиалга чиқолмадилар. Лекин фикримча, Хитой жамоаси ўз потенциалидан юқорироқ натижага эришди. Оддий таққосласак, биз аслида Хитой термасидан сезиларли даражада кучлимиз. Лекин бу натижада акс этмади. Эрон термаси муваффақиятида эса футболчилардан кўра, Карлуш Кейрушнинг ҳиссаси катта. Демоқчиманки, бизга ҳам Кейруш ва Липпи даражасидаги мураббий керак.

Одил Аҳмедовнинг Хитой чемпионати-2017даги статистикаси. Ҳамюртимиз маҳаллий Супер-лига доирасидаги 30 та ўйиндан 19 тасида майдонга тушиб, рақиблар дарвозасини 3 марта ишғол қилди ва яна битта гол ҳаммуаллифига айланди, шунингдек, 4 марта сариқ карточка олди, «қизил» йўқ.

Манба: interfutbol.uz “Замин” янгиликларини “Youtube”да кузатиб боринг